Kum 5 chhungin district-in a neih tur ang an nei kim ang - Dr Thangtea

Minister Dr R Lalthang­liana chuan kum 2008-a MNF sorkarin district head­quar­ters atana a lo puan tawh - Hnah­thial, Khawzawl leh Saitual-te chuan kum nga chhungin district-in a neih tur ang an neih kim vek tur thu a sawi.

Tun hnaia a bial chhung khaw hrang hrang a fannaah Dr R Lalthangliana chuan, sorkar hmasain district atana a puan tawh Hnahthial, Khawzawl leh Saitual-te a puitlin theihna atan budget session hmasa berah pawisa dah a nih tur thu a sawi a, "Mahse, ṭum khatah engkim a famkim nghal thei vek lo. District pathum kan tih­puitlintir turte hian kum nga chhungin kawr an hâk tur ang ang chu ha kimin, fuke kim an nei vek ang," a ti.

Dr R Lalthangliana chuan, district an tihpuitlin hunah chuan a huam chhunga depart­ment awm sate tilianin, a ṭul ang zelin department dang pawh hawn belh a 

ṭul dawn thu a sawi a, "Kum nga a kal chuan he bialah leh Zoram hmun hrang hrangah hmasawnna thar nasa tak kan hmu dawn. Bial mipui leh MLA-te hi a hnaih thei ang berin inpawh vek ang u," tiin, mipuite chu sorkar tharah hmasawnna beisei turin a chah.

SEDP atan budget-ah cheng vbc. 1,000 an dah tur thu sawiin Dr R Lalthang­liana chuan, "Development hi kalpui dawn tak tak chuan sum ruahmanna pawh a lian tham dawn a, mahse, hnathawh leh sum a inmil tur a ni. SEDP hi a thawk tak takte tan chauha dinchhuahna tur a ni. A tak taka thawkte chuan an dam chhunga chhiat tawh lohna tur eizawnna nghet neiin, thiam bikna nei leh nei lote tan pawh an thawh tur ruahmanna ṭha tak kalpui a ni ang," a ti.

R Lalthangliana chuan, SEDP sum dawngtute'n an sum dawnte chu a hmanna tur tih ni loa an hman a rem­chang dawn lo tih sawiin, "Rinawmna leh taimakna a pawimawh ber dawn. SEDP hi project base-in kan kalpui dawn a, NLUP kha chu a buaipui leh titute ngei pawh khan an kalpui dan kha an duh dan ber a nih ka ring lo," a ti a; SEDP chu NLUP anga sema duh duhnaa hman theih ang a nih ve dawn loh thu a sawi.



Share this Post

Login to comment
No Comments