PHE E-in-C pisa tur sak mekah Ban phun belh lo turin CM-in a ti

Chief minister Zoramthanga chuan nimin chhun khan New Capital Complex huam chhunga PHE department engineer-in-chief pisa building sak mek a tlawh a, tuna ban phun tawh sa bak chu phun belh tawh lo turin a hriattir.

Chief Minister chuan, sorkarin mipui sum tam tak senga building awm sa, chhungkaw 18 laiin an luah lai Congress sorkarin ram ruak anga a entir vanga department hrang hrang a lo pek tawh zinga building pahnih hmuna ram pekte'n ṭha takin an kalsan tawh tih a sawi.

Chutih laiin, Type-IV building pakhat, chhungkaw parukin an luah mek chu PHE E-in-C building sak mekin a tibuai nia sawiin, E-in-C pisa building sak mek chu quarters building awm lai ṭhiat loa sak chi a nih loh avangin, tuna ban an phun tawh bak chu ban phun belh tawh lo tur leh, building awm sa thlang lam panga in sak tura ruahmanna kal mek chu chhunzawm lo turin PHE department leh contractor a hriattir a ni. CM chuan, "Sorkarin uluk deuhin a la enfiah dawn a ni," a ti.

Chief Minister hi MNF Vigilance & Legal Board secretary David R Lalsawmtluanga leh Legal Board member te, Khatla Local Council leh MNF ṭhalai vice president H Ramdinliana ten an ṭawiawm a ni.



Share this Post

Login to comment
No Comments