Eirûk leh discipline ṭha lo ka hua - HM Lalchamliana

Mizoram Police chuan nimin khan Police Headquarters-a Arya Mess-ah Home minister Lalchamliana lawmna hun an buatsaih. Home Minister chuan, eirûk leh discipline ṭha lo a huat thu a sawi.

Inkhawm hi IGP (Hqrs.) John Neihlaia'n a kaihruai a; Lalchamliana chuan, eiruk leh discipline ṭha lo a huat tak zet thu sawiin, "Ka pa hian, 'I thawh chhuah ni lo pawisa awt ngai suh,' min ti ṭhin a, zawm hrâm ka tum ṭhin. A hlâwm a len deuh phei chuan zawm a har ṭhin viau a, mahse, ka pa min zilhna ka hre reng ṭhin," a ti. 

Home Minister chuan, Mizoram Police-te chu India ram mai ni lo, khawvela police ṭha ber ni thei khawpa hlângkai tura theihtawp chhuah turin police officer-te a sáwm a, "Ka lawm zawng ni lo, Mizoram tan leh police tana ṭha tur min hrilh ru," a ti a; police officer-te an chhungte eng party mi pawh ni se, a en hran dawn loh thu a sawi.

Lalchamliana chuan police leh dulkiar a inhmeh lo tih sawiin, "Hei hi tihreh theih dan zawn a ngai. Taksa fitness hi police-ah chuan a pawimawh hle. Nun uluk tâwk loh vang leh ei leh in insûm loh vangin nunna chán an tamzia kan hre vek. Duty hun chhunga zu rui reng reng dîm suh u. Chutih rualin, a ngawlvei tawhte chu doctor leh psychiatrist-te râwnsak rawh u," a ti. 

Tun aṭanga rei lo têah transfer & posting tih a ngai dawn tih sawiin Home Minister chuan, "Order ka tihchhuah tawh chu tihdanglam harsa ka ti ṭhin. Mi pakhat hmun khata rei deuh awm hi a ṭhatna a awm rualin, a ṭhat lohna a tam zawk. In awm duh lo leh awm duhnate in pute hrilh rawh u, in duhna takah erawh a awm theih kher lo ang," a ti a; transfer & posting chu fair taka tih a duh thu a sawi. 

Lalchamliana chuan ram himna atan ramri venhim ṭhat a pawimawh thu sawiin, "Interna­tional boundary-te chu central police force lam chan a ni a, state boundary-te chu kan chan a ni. Mipuite thlamuanpui khawpin duty kan indah em tih ngaihtuah a ngai, police an tam chuan mipui an thlamuang ṭhin. Assam Rifle leh BSF-te pawh ramri venghim uluk tura hrilh a ṭul," a ti. 

Home Minister chuan, police hna bulpui ber pakhat chu dan leh thupek kenkawh a nih thu sawiin, "Tun dinhmunah chuan dan leh thupek kenkawh kawngah harsatna lutuk kan tâwk lo. Kan hmaah eng pawh thleng thei a ni a, chumi atan chuan inbuatsaih a ṭul," a ti a; police hna ṭha taka thawk tur chuan discipline a pawimawh tih a sawi. 

Lalchamliana chuan, zu zawrh tihtawp tumin sorkarin hma a lak mek thu sawiin, "Hemi chungchang Excise & Narcotics department mawhphurhna a nih rualin, police pawhin mawhphurhna kan nei," a ti a; police officer kalkhawmte chu sorkar hmalakna thláwp tura an naute chawk phûr turin a chah.

DGP mawhphurhna la mektu IGP (Law & Order) LH Shanliana pawhin thu sawiin, police-ah post hnawhkhah loh a tam thu a sawi a, "Basic minimum requirement tal awm thei se. Hmeichhe police lamah pawh kan indaih lo hle a, Police Commission chuan 30% awm tura a phût laiin, 7% vel bak Mizoramah an awm lo. Hmeichhiate chu hmeichhia vêkin an man a ngaih avangin harsatna kan tâwk a ni," a ti.

LH Shanliana sawi danin, Mizoram Police hian sub-station 17, police station 40 outpost 15 leh beat post eng emaw zat an enkawl a; chungahte chuan police awm zat tur aia tlem an awm vek a ni.



Share this Post

Login to comment
No Comments