Synod hnuaia thawktu lakah zuk leh hmuama fihlim chauh lak an ni tawh dawn

Mizoram Synod Inkhawmpui vawi 95-na, Electric Veng Kohhran biak-ina neih mekah nimin khan moderator Rev. R Lalhmingthanga kaihhruaiin rorel inkhawm chhunzawm a ni a; Synod hnuaia hnathawk tur lâknaah zûk leh hmuama fihlim chauh lak tura rawtna lut chu pawm a ni.

Aizawl West II Presbytery aṭanga rawtna lut, Synod hnuaia thawktu lak tura zuk leh hmuam laka fihlimte  chiah la tura rawtna chu pawm a ni a, Synod Executive Committee (SEC) bawhzui tura tih a ni.

Synod Inkhawmpui dawna thil pawimawh leh pastor transfer & posting ruahmannate a hun hmaa a darh (leak out) lohna atan ṭan lak an rêl.

Tun ṭum Synod Inkhawmpuiah hian general agenda zingah - 'Pastor transfer & posting Synod-a pharh hmaa leak-out lo tura ṭan lak rawtna' leh, 'Synod Inkhawmpui dawna Committee hrang hrang thurel sawi darh loh dan zawn' chungchang a lut a; inkhawmpui chuan pawmin, SEC bawhzui turin a dah.

Nimina Synod Inkhawmpui rorel zingah - Vellore Mizoram House-a staff nurse dah te, Mizoram Synod hnuaia thawk tur lâknaah zûk leh hmuama fihlim chauh lak te, tunlai thiamna hmanga nau pâi leh fa neih chungchang inkaihhruaina tihdanglam rawtna leh, Synod Hospital Charity Fund puala thawhlawm thawhte a tel.

Synod Inkhawmpui rorel hi vawiin leh naktukah pawh chhunzawm leh a ni ang.

Nimin thleng khan rorel palai 2089 an inziak lut tawh a, heng zingah hian riak lut mi 887 an ni.



Share this Post

Login to comment
No Comments