BJP chu sawichhiat leh nèksàwr kan ni - Prof. JV Hluna

BJP, Mizoram Pradesh president Prof. JV Hluna chuan, Mizoram inthlanpui atana campaign laiin an party, BJP chu sawichhiat leh nèksàwr an nia sawiin, chutiang chu an nih loh thu a sawi a, "BJP tan emaw, party tan emaw ding loin, kan ram tan party hi hmang zawkin, eng sorkar leh party pawh BJP chuan kan ram tan a thawhpui zel dawn a ni," a ti.

Prof. JV Hluna chuan nimin khan an party pisaah thuthar thehdarhtute kâwmin, "Campaign laiin BJP chu sawichhiat leh nèksàwr kan ni a, kan ram tana ṭha tur a nihna hliah vekin Kristiante dodaltu angin min chhuah. Chutih laiin, rilru puitling tak púa ram politics hrethiamte'n nasa takin min ṭanpui a ni," a ti a; thu dik hriaa thláwp zel tur leh politics chu sakhuana nena ngaihfin zel lo turin mipui a ngen.

JV Hluna chuan, political party hruaitu ṭhen-khat leh kohhran hruai­tu ṭhenkhatte'n BJP an beihnate chu âtthlâk tak nia sawiin, "Development hmangin an thlêm ang che u, an han ti hi chu, development duh vanga mipui kan rûm laia hetiang zawnga tute emaw buma an awm hi a pawi kan ti. Mizoram mamawh, kawng tinrenga development kan neih theihna turin BJP Mizoram chuan hma kan la zel dawn a ni," a ti.

Lal Thanhawla leh Congress party hruaitute'n 'BJP-te'n Bru candidate an dah dawn,' tia sawiin Mizo mipui an bum nia sawiin JV Hluna chuan, "BJP hian Bru candidate kan nei lo tih hi Zoram mipuite hi a hretute kan ni," a ti. 'Inthlan dawnah BJP-ten pawisa an chelek dawn' tih hmangin mipui a bum bawk nia sawiin, BJP-in seat 39 an chuhnaa mipui leh Congress candidate-te chu BJP-in sum hmangin mipui hlutna leisak an tum lo tih an hre chiang niin a sawi.

Prof. JV Hluna chuan, Lal Thanhawla vêkin, 'Inthlan result puan zawhah MLA leina tur sum Assam Rifles-ah nge CRP-ah an dah,' tih hmangin mipui bum a tum leh mek tih sawiin, "Hei pawh hi thu dik lo bawk a ni. Kristianna káwra hmang a, ram mipui zahna nei lo hruaitu kan nei hi a vanduaithlak a, zu zuar sorkar tih âwm tâwk hi ti reng lo se kan duh," a ti a; MLA leina tur sum AR-ah emaw CRP-ah emaw an dah a tih chu a sawifiah loh chuan BJP-in dâwta inpuh hming­chhiatna case an file dawn tih a sawi bawk.

Mizoram BJP President hian Mizoram inthlanpuiah hmasawnna tam tak a awm nia sawiin, Mizoram mipui chungah lawmthu a sawi a ni.



Share this Post

Login to comment
No Comments