1st. MSP Photograhic Salon ṭan a ni

Photography Club of Mizoram leh Mizoram School of Photography (MSP) chuan nimin khan Archives Hall, Aizawlah 1st MSP Photograhic Salon an buatsaih a, MFA honorary secretary Lalnghinglova Hmar-in a hawng.

Lalnghinglova Hmar chuan, Photoographic Salon buatsaiha luh man (entry fee) an la chu ṭha a tih thu sawiin, "Photographer-te hi khawvel history kawltu, kan vawiin hman dan ṭha taka chhinchhiahtute an ni a, an hlu a ni," a ti a; ram mawina leh nungchate humhalh leh mi dangte hnena pholang theitu chu photographer-te an ni tih sawiin, "Kan thlalak hmang hian khualzinte kan hîp lut thei a ni," a ti a, thlalak nalh tak takte khawvel mithmuha pho chhuak nasa leh zual turin a chah.

Camera hmangin thil ropui tak a tih theih rualin, mi nuihzata mi siam theitu a ni tih sawiin Lalnghinglova chuan, "Mizo society mila kan chêt thiam a ngai a, thlalak hmangin mi 

ṭhenkhat an mualpho leh zauh ṭhin a, Mizo hmeichhiate zahawmna humhimtu photographer in nih zel a ngai takzet a ni," a ti.

Photographic Salon-in a tum ber chu, thlalak awm ze nei phochhuah leh Mizote'n photography nihna dik tak kan hriat theih nan a ni. Salon hi December 7, Zirtawpni thleng neih a ni dawn a, mi 37-te kutchhuak thlalak 103 pho chhuah a ni.

Photography Club of Mizoram hi MSP aṭanga zir chhuak tawhte'n an din a ni a, member 50 vel an awm mek a ni. 



Share this Post

Login to comment
No Comments