Tuirini lei chim chhan puangzar turin MNF ṭhalaite'n PWD Minister an phût

MNF ṭhalaite chuan, February 13, 2018-a Tuirini lei chim chhan chhuina Magisterial Inquiry report chu September 30, 2018 ral hmaa puangzar turin PWD minister Lal Thanzara an phût a; Lal Thanzara chu Mizoramin PWD Minister a neih tawh zingah 'A ngaihna hre lo ber' a an ngaih thu an an puang.

MNYF hruaitute chuan nimin khan Aizawl Press Club-ah thuthar thehdarhtute an kawm a; an vice president Lalremruata Chhangte chuan, mi pakhatin a thih phahna, kumin February 13-a Sesawng leh Khawruhlian inkara Tuirini lei dawh mek chim chu Aizawl DC Dr A Muthamma kaihhruaina hnuaiah Magisterial Inquiry chhuitir a nih thu leh, Inquity chuan May 23-ah sorkarah report a thehluh tawh thu a sawi.

Magisterial Inquiry report thehluh aṭanga thla li vel a liam hnuah pawh tun thlenga Mizoram sorkarin lei chim chhan mipui hriata a puangzar ngam lo chu mak an tih thu sawiin Lalremruata chuan, "He thilah hian puanzar ngam loh thil inthup a lan vang nge, a dik lo zawk tawrhtir tumna a awm zawk? September 30, 2018 ral hma ngeia puang chhuak turin PWD minister Lal Thanzara kan phût a ni," a ti.

Lalremruata Chhangte chuan, "Lei chima mawhphurtu zawng chhuaka hremna pe tura nawrna a awm mek laiin, a mawhphurtu chhui chhuak lo a, mawhphur lotu chauh a chhui chhuak thei hi a mak kan ti a, amah thlang tlingtu mipui zahlohna tàwpkhâwkah kan ngai," a ti a; PWD Minister chu a mawhphurhna hlen zo hlawl loa an ngaih thu a sawi.

MG Road, Upper Khatlaa lei dawh mek, February 16, 2018-a dawh ṭan tawh chu tun thlenga zawh a la ni lo tih sawiin Lalremruata chuan, "June, 2018 ral hmaa zawh tur an pawhsei hnuah, an hun tiam hnuhnung September 2018 pawh a ral leh ṭep tawh. Tuna hna thawh mek en hian kumin chhungin an siam zo hman lo mai ang tih a hlauhawm leh ta hle," a ti a; hna muang lutuk chu thuneitute inthlahdah vanga an ngaih thu sawiin, "A rang thei ang bera dawh zawh a nih theih nan chak zawka hma la turin thuneitute kan phût a ni," a ti.

MNYF Vice President chuan, sorkar kum kal ta, 2017-18 chhung khan kawngpui chhia thawm ṭhatna tur (road maintenance fund) Mizoram sorkarin cheng 9,606.49 a nei tih sawiin, "Kawngpui a chhiat em vanga hman zawh vek a, sum dil belh zawk âwm tak a nih laiin, nuai 1570.47 an hmang bâng thei a ni," a ti a; PWD Minister chuan engtikah mah Mizote kawng ṭha a pek theih an rin loh thu a sawi.

Lalremruata Chhangte chuan, Lal Thanzara chu PWD enkawl zo thlâwt loah an ngai tih sawiin, "Minister a nihna a bànsan ngam lo a nih pawhin an sorkar hun thla hnih/khat lek la awmah hian remhre zawk kuta PWD hlan mai turin kan phût a ni," a ti.

PWD Minister hnena hun an pek, September 30 ral hnua an hmalak dan tur zawhna chhangin MNYF Vice President chuan, "Kan nawr deuh ka ring, nawr a ngaiin kan hria. Tuirini lei a chim chhan chu eng pawh ni se, an puangzar ngam tur a ni," a ti a; an kal zel dan tur chu an la ngaihtuah tur thu a sawi.



Share this Post

Login to comment
No Comments