Congress party-in MIMER, Falkawnah MIMER leh Tuirial HEP an lawm

Mizoram Pradesh Congress Committee (MPCC) chuan nimin khan Falkawna Mizoram Institute of Medical Education & Research (MIMER) hmunah MIMER leh Tuirial Hydro Electric Power (HEP) project lawmna leh lawmthu sawina hun an buatsaih. Khuallian, MPCC president leh chief minister Lal Thanhawla chuan, Congress party leh a kaihhruai sorkarin hmathlir an neih ṭhat thu a sawi.

Lawmna inkhawm hi Or­ganising Committee chairman Lal Thanzara, Health minister-in a kaihruai a; Muallungthu bialtu pastor Rev. PC Lalbiaktluanga'n hunserh a hmang. Chief Minister chuan, an party hruaitute chuan hmuhsit tâwk ṭhin mah se, hmathlir an neih ṭhat thu a sawiin, "Inkalpawhna tur siam mekte a zawh hun chuan Mizoram hi Gateway of South East Asia ni dawn," a ti.

Lal Thanhawla chuan, sor­karna an siam apiangin Mizo­ramah remna leh muanna a awm ṭhin thu sawiin, "Tute pawhin harsatna siamin, silai lekin hma la ṭhin mah se, kan hotute'n remna an siampui thei zel a ni," a ti a; remna leh muanna an awmtir theih ṭhin chhan chu Pathian hruaina vang a nih thu a sawi.

Tuirial HEP leh MIMER chu Congress sorkar laia bul ṭan, an awm loh hnua chhunzawm loh a nih thu sawiin Lal Thanhawla chuan, "MIMER hi kan hun laia bul ṭan a, cheng vbc. 40 lai kan hnutchhiah hlawhtling ta si lo, kan lo kir hnua tihhlawhtlin leh a ni. A lawmna hun buatsaih hi kan tih âwm reng a ni," a ti.

MPCC President chuan, MIMER leh Tuirial HEP lawmna atan sorkar sum hmang loin, mi ṭhahnemngaite thawhkhawm hman a nih thu a sawi a, sum hman bâng chu damdawi-ina awm mek mi harsate tan hlan a nih dawn thu a puang.

MPCC treasurer H Lian­sailova pawhin thu sawiin, lawm­thu sawi mai loh chu sawi tur vak an nei lo niin a sawi a, "Kan hlawhtlinna hi mipui zawng zawng tan a ni a, a hmuna lo kal ve lote pawhin kan lawmna hi min ṭawmpui ngeiin ka ring," a ti.

H Liansailova chuan zu chungchang sawiin, "Zu hi inthlahrung takin, mithiamte'n kan ṭhatpui an rin vangin zawrh a ni. Inthlahrung taka tih a nih vangin a zir chiang turte din a ni," a ti a; ruihhlo chungchangah chuan indem lo a, ṭanho a ṭul zawka a hriat thu a sawi.

MIMER leh Tuirial HEP lawm­naah hian Mizoram hmun hrang hrang aṭangin Congress party mi leh sate an kal khawm a, Aizawlah awm Congress party MLA-te an tel kim thawkhat. Tuirial HEP lawmnaah hian Power & Electricity minister R Lalzirliana a kal ve lo thung.

MIMER leh Tuirial HEP lawm nan tlaiah ruai an ṭheh a; ruai atan hian bawng paruk leh vawk pariat, ar leh kel eng emaw zat an talh a, mi 7,000 ei turan an hisap laiin, mi 8,000 chuangin ruai an ṭheh thu Organising Committee hotute chuan an sawi.



Share this Post

Login to comment
No Comments