NCD screening software tlangzarh

Natna inkai chhâwn theih loh, non communicable diseases (NCD) atana hmalakna tur, Population Based Screening tihhlawh-tlinna atana ruahman, NCD screening software/application thar chu April 14, Inrinni khan prime minister Narendra Modi-a'n a tlangzarh.

NCD-ah hian cancer, zunthlum, thisen sang, heart attack leh stroke-te a tel a; heng natna laka fihlim theihna tur leh taksaa pawi a khawih hmaa hmuhchhuaha enkawl vat a nih theih nan Population Based Screening (Universal NCD Screening) tih chu kalpui a ni a; Universal NCD Screening tihhlawhtlinna atan NCD screening software/application siam thar a ni.

Software tlangzarhna hmun hi Jangla, Chhatisgarh-ah neih a ni a, Prime Minister-in a tlangzarh rual hian India rama damdawi-in hrang  hrangah video conferencing hmangin an lo ṭawiawm a; Mizoramah chuan Aizawl, Lunglei, Kolasib leh Champhai  district -ahte National  Programme  for  Prevention  and  Control  of  Cancer,  Diabetes,  Cardiovascular Diseases & Stroke (NPCDCS) bul tumin hun lo hman ve a ni.

Universal NCD screening-ah hian kum 30 chin chung lam zawng zawng chu NCD natna panga - chhûl cancer, hnute cancer, ka chhung cancer, thisen sang leh zunthlum an neih neih loh enfiah a ni dawn a; a tum ber, chu NCD natnate miin an vei loh nan te, an vei a nih pawhin taksa a khawih chhiat hmaa hmuh chhuah vat leh enkawlna pek vat a ni.



Share this Post

Login to comment
No Comments