Vanglaini - Thli tlehin in 17 a tichhia

KHAWTHLIR

Tualthahna dem

April 13, Zirtawpni zan dar 10 vel khan Rodinsanga (36) h/o Vanlalchhungi, Chhinga Veng chu Electric Vengah Electric Veng tlangval pakhatin a vit a, a hnu lawkah Rodinsanga hi a hliam tuar loin a thi. Rodinsanga vittu hi kumtling lo (kum 17 mi) nia sawi a ni a, thuneitute'n an man nghal. He thil thleng chungchangah hian Chhinga Veng Local Council, YMA, MHIP, MUP leh JAC chuan thuchhuah siamin, Rodinsanga chunga thil thleng chu hriatthiam har an tih thu leh an dem thu an tarlang a, "Tualthattu hi a na thei ang bera hrem ni ngei se kan duh," an ti.

Lok Adalat

Inrinni khan Kolasib Lok Adalat Sitting chu Kolasib District Court ah neih a ni a, thubuai an ngaihtuah 42 zinga pali chinfel a ni a, thubuai an ngaihtuahte hi pawisa leiba inṭhinna a tam ber a, a bak chu ram in chuh, criminal case inpuh hmingchhiatnate an ni. Leiba ṭhinna aṭangin Rs. 29,600 hmuh a ni.

Inremnaah lawm

Congress party chuan thuchhuah siamin, Mizoram Sorkar leh HPC(D) inremna chu lawmawm an tih thu an sawi a, "April 13, 2018-ah CTI, Sesawngah HPC(D)-te'n an silaite tunga Home Coming Ceremony neih a ni thei ta hi lawmawm kan ti a, inremna a awm theih nana hma latu Mizoram sorkar leh HPC(D) hruaitute chungah lawmthu kan sawi a ni," an ti.

Thisen pe

Inrinni khan Ramthar Tlangveng Branch KṬP chuan Synod Hospital tan thisen unit 31 an pe a, a petute mipa 23 leh hmeichhia pariat an ni. ṬKP Peniel unit, Thingkah leh Thingkah unit-te'n Lawngtlai District Hospital tan thisen unit 10 an pe bawk a, a petute mipa pakua leh hmeichhia pakhat an ni.

Judge-in enfiah

Gauhati High Court, Aizawl Bench-a judge, Justice Nelson Sailo chuan Inrinni khan Lawngtlai a tlawh a, Law & Judicial department building hrang hrang a enfiah. Nelson Sailo hian Lawngtlai DC Complex-a District Court building hman mek chu tlawhin, a dinhmun a enfiah a, Lawngtlai Vengpuia Judicial officer quarters pathum sak mek tlawh lehin, chak leh ṭha zawka sak chhunzawm zel dan tur an sawiho.

DAWNTISEI

Thli tlehin in 17 a tichhia

April 14, Inrinni zing khan Kolasib leh a chhehvelah thlipui a tleh bakah, ruah leh rial a sûr a, Rengtekawn, New Builum leh Buhchangphai khuaahte chenna in 17 a tichhia.

YMA Sub-Hqrs., Kolasib hnuaia Disaster Management Committee hruaitute sawi danin, thli tleh hian Rengtekawnah chenna in pakhat luah tlak loha a tihchhiat bakah, in dang 10 a tichhia a, in chhia thawm ṭhat theihte chu Inrinni khan khawtlangin an thawm ṭha. In chhia zingah hian BCM biak-in pawh a tel.

Rengtekawn bula New Builum khuaah pawh chenna in panga a chhia a, in chhiate chu thlipuiin a chung rangva a tihchhiatte a ni tlangpui. Buhchangphaiah pawh chenna in pakhat a chhe vek bawk.

Kolasib district-a chhiatna tawkte hi Kolasib DC office-a Disaster Manangement & Rehabilitation Branch-a thawkte'n a ṭul angin an buaipui a ni.

Share this Post

Login to comment

No Comments