Mizoramah Missionary Day hman a ni

Nimin kha Mizorama missionary hmasate'n Mizoram leilung an rah hmasak ber ní champha, Missionary Day a ni a; Baptist Church of Mizoram (BCM) kohhran hrang hrangte'n an hman bakah, Presbyterian Kohhrana Dawrpui Pastor Bial leh BCM Aizawl East Bialte'n a huhoin MacDonald Hill-ah an hmang.

Missionary Day hi BCM tualchhung kohhran hrang hrangte chuan an biak-in ṭheuhah lawmin, an inkhawm a; kohhran ṭhenkhat chuan a lawm nan ruai an ṭheh a ni.

Dawrpui Pastor Bial leh BCM Aizawl East Bialte chuan nimin zing khan Mizorama missionary hmasa, Sap Upa (Rev. FW Savidge) leh Pu Buanga (JH Lorraine) te ṭhut­hmun, MacDonald Hill, Zarkawta missio­nary lungphunah a huhoin an hmang.

MacDonald Hill-a inkhawmah hian Mizorama missionary hmasate lo thlen dan leh an hnathawh dante sawi a hi a; Dawrpui Bial Zaipawl leh BCM Chanmari Kohhran Zaipawlte'n hla an rem a ni. Inkhawmah hian kohhran mipui an kal ṭha hle a; a lawm nan thingpui ruai an ṭheh nghal a ni.

Mizorama missionary hmasa Rev. FW Savidge leh JH Lorraine-te hi Wales rama Arthington Mission tirha Mizorama Pathian thu puagndarh tura rawn kal an ni a, January 11, 1894-ah Sairang thlanga Changsil kâi thlengin, chu an thlen champha chu Missionary Day atan hman a ni.

Presbyterian Kohhran erawh chuan January 11-ah hian kum eng emaw zat Chanchin Ṭha Thlen Ni (Missionary Day) an hman hnuah, Synod Inkhawmpui thutlukna angin Rev. William Williams-a'n Tlawng lui Kutbul lui chhuah a thlen ni, March 15, 1891 chu Chanchin Ṭha Thlen Ni atan an pawm a; kum 2014 aṭang khan March 15-ah Chanchinṭha Thlen Ni an hman ṭan tak avangin January 11-ah chuan a hranpain hun an hmang tawh lo a ni. 



Share this Post

Login to comment
No Comments