World Antibiotics Awareness Week hmang

Nimin khan World Antibiotics Awareness Week hman ṭan a ni a, Health Minister Lal Thanzara'n Aizawl Civil Hospital conference hall-ah a hawng. Thupui chu 'Antibiotics i hman hmain mithiamte ráwn rawh' tih a ni.

Health Minister chuan, antibiotics-te chu a dik loa hman chuan thil pawi zawk thlentu a ni thei tih sawiin, "Anti­biotics hman fimkhur hi mi zawng zawng mawhphurhna a ni. Ṭhenawmte ngeih ang damdawi ei ve mai chíng kan ni a, hei hi a ṭha lo hle. Mithiam ràwn hma­sak zel a ṭha a, chu chu kan himna tur a ni," a ti.

Lal Thanzara chuan, doctor zingah actibiotics chawh uar lutuk a awm theih tih sawiin, "Fimkhur lehzual a ṭha. Kan ramah ngei pawh antibiotics hman fimkhur loh vanga harsatna a awm tawh ṭhin a ni," a ti a; ram mipuiin inenkawlna ṭha zawk an neih theih nan World Antibiotics Awareness Week chu ṭang­kai taka hman a nih ngei a beisei thu a sawi.

Mizoram sorkarin mipui hriselna atan nasa takin hma a la tih sawiin Thanzara chuan, "Mipui pawhin tih ve tur ka  nei a, awareness kan neih ṭhat a ngai. Ei leh in leh kan lifestyle (nunphung) kan thlâk danglam a ngai tawh a ni," a ti.

Lal Thanzara chuan, Aizawl Civil Hospital (ACH)-a RKS hnuaiah Hepatitis-C veite chu February 27, 2017 aṭang­in a thlawna enkawl an ni tih sawiin, "Mi 563-te free treatment pek an ni tawh a, mi 563-te inenkawlna senso zawng zawng hi ACH RKS fund aṭangin sorkarin a tumsak a, Rs. 1,10,72,090 sen a ni tawh," a ti a; Hepatitis-C veite a thlawna enkawl chu ACH-ah chauh kalpui la ni rih mah se, district hos­pital dangah pawh kal­pui thuai tum a nih thu a sawi.

Health Minister chuan, NEDP aṭangin ACH thuam ṭhat nan Rs. 1,95,26,367 man bungrua chi hrang hrang lei a nih tawh thu a sawi a; sorkar laipuia Ministry of Social Justice & Empowerment hnuaia Dr Ambedkar Me­dical Aid Scheme hmang­in natna khirh bik chi hrang hrang veite inenkawlna senso tumsak a ni tih sawiin, "ACH kaltlanga he ṭanpuina dil hi mi 68 an awm tawh a, mi 39-in ṭanpuina hmu tawhin, chuta tan chuan Rs. 74,13,856 pek tawh a ni," a ti.

World Antibiotics Awareness Week hawnna inkhawmah hian ACH leh damdawi-in danga thawk te, Health department, RIPANS leh damdawi lam buaipuitute an tel a; RIPANS-a zirtirtute'n antibiotics chungchang an sawifiah a ni. 



Share this Post

Login to comment
No Comments