7th. Pay zir chiang tur din a ni tawh - FM Sawta

Council of Minister thu angin Mizoram sorkar chuan a hnathawkte 7th. Pay anga hlawh pek ve zir chiang­tu tur Study Group a din tawh a, State Planning Board vice chair­man H Liansailova'n a kaihruai dawn.

Vanglaini palai zawhna chhangin Finance minister Lalsawta chuan, 7th. Pay zir chiangtu tur din a nih tawh thu a sawi a, "Ruahmanna pawh Chief Minister-in a pawm tawh a, mahse, order tihchhuah a la ni chiah lo mai thei," a ti a; Study team chu Planning Board vice chairman H Liansailova'n a kaihhruai tur thu a sawi.

Finance Minister chuan, Study Team-te'n report an thehluh hunah an report chu Cabinet-in a zir chian leh tur thu a sawi a, "An report thehluh hi Cabinet-in a zir chian hunah, an report kalphung azirin sorkar chuan thutlukna a siam dawn a ni," a ti.

Lalsawta chuan, tun dinhmunah pawh Mizoram sorkar chuan 7th. Pay angin a hnathawkte hlawh a pek theih thu a sawi a, "Mahse, 7th. Pay anga hlawh kan pek chuan thil hrang hrangin a tuar a ngai thung dawn a ni," a ti a; tun dinhmuna 7th. Pay anga hlawh pek a nih chuan tui supply, buhfai, hmasawnna hnathawh leh thil dang hrang hrangin a tawrh tur thu a sawi.

Zawhna chhangin Finance Minister chuan, hlawh atan sorkar laipuiah sum dil belh a nih ṭhin a hriat loh thu a sawi a, "Thil dang mamawhah chuan sorkar laipui dil ṭhin a ni a, hlawh atan hi chuan dil a ni ngai em ka hre chiah lo," a ti. 

Finance Minister sawi danin, Central Pay Commission-in hlawhbi thar a siam reng rengin, a tlangpuiin Mizoramah chuan kum thum hnu velah tihhlawhtlin a ni tlangpui ṭhin.

Hetih lai hian, Mizoram sorkar hnathawkte chuan 7th. Pay anga hlawh lak ve phût hian November 9-10, 2017 khan badge dum belin pisa an kai a, November 20 leh 23 hian hnathawk loa pisa kai an tum bawk a ni.



Share this Post

Login to comment
No Comments