Aizawla MUDRA Promotion Campaign Union Agriculture Minister-in a hawng

Nimin khan Kulikawn YMA Hall-ah MUDRA Promotion Campaign neih a ni a, Union minister of state for Agriculture and Farmers Welfare Gajendra Singh Shekhawat-a'n a hawng.

MUDRA Campaign hi Ministry of Finance hnuaia Department of Financial Services, Mizoram sorkar leh State Level Bankers Committee-te buatsaih a ni a, Mizoram Finance minister Lalsawta khualzahawm a ni. 

Union Minister chuan, Jan Dhan Yojana hnuaiah bank account siam thar an tam a, account nuai 3,000 vel a awm tawh thu sawiin, direct benefit transfer hmangin hamṭhatna dawngtu tur dik takin an dawng tawh niin a sawi a, "Stand up scheme pawh entrepreneur chak leh zuala hmalakpui tumna a ni a, a tui mite tana awlsawm taka loan lak theihna a ni," a ti.

Gajendra Singh Shekhawat chuan, MUDRA chu mahni kutkawih ngeia eizawngte'n dinchhuahna atan an hman theih thu sawiin, "Sorkar laipuiin entrepreneur-te hmakhua a ngai pawimawh a, MUDRA hian entrepreneur-te tan hmasawnna a thlen ngei ka beisei," a ti a; MUDRA scheme chu scheduled caste, scheduled tribe leh other backwarded class (OBC)-te tan dahkham ngai lo leh guarantor ngai lo loa bank loan lak theihna a nih thu a sawi.

Khualzahawm, Finance minister Lalsawta chuan, bank-a thawkte chu anmahni dawrtute tana nèlawm an nih a ngaih thu leh mipui tan an thawk a ni tih an hriat reng a ngaih thu a sawi a, "MUDRA scheme hi thil tih awlsamna pawimawh tak a ni. Miin fimkhur leh uluk taka pawisa a hman chuan an dingchhuak thei a ni," a ti.

Inkhawm hi Finance secretary Lalmal­sawma'n a kaihruai a, Aizawla lead bank, SBI general manager (NE) Digmanu Gupta-a'n inlawmna thu a sawi. Bharat Interface For Money (BHIM) hman dan entir a ni a, mi 53 hnenah MUDRA loan sem a ni.

MUDRA campaign-ah hian Aizawla bank awm zawng zawng an tel a, a hmunah loan dil duhte tan loan dil theih niin, loan application pek chhuah nghal zel a ni. Insurance company-te leh BSNL-te an tel bawk.

MUDRA scheme hnuaiah hian loan chi thum a awm a; chungte chu - Sishu (Rs. 50,000 aia tam lo), Kishor (Rs. 5,00,000 aia tam lo) leh Tarun (Rs. 10,00,000 aia tam lo)-te a ni. MUDRA Promotional Campaign hi kumin September 27 - October 17 chhungin khawpui 50-ah neih a ni ang. 



Share this Post

Login to comment
No Comments