Filmfare Award March 23-ah sem a ni dawn 'Padmaavat' langsar

India rama film lama chawimawina semchhuah ṭhin zinga ngaihhlut ber pakhat, Filmfare Award chu March 23 hian sem a ni dawn a, award dawng thei tura chhawpchuah hrang hrangte pawh puan a ni ta.

Chung zinga langsar ber tih ngam chu 'Padmaavat' a ni a, award dawng tur pawha rinkai ber a ni mek. Padmaavat bakah hian - Raazi leh Sanju te chu an langsar viau bawk. 

Best Film 

Nikum chhung khan Bollywood film hit tak tak chhuak a awm nual a, Best Film category-a chhawpchhuahte pawh an hrawl tlang hle. He category-ah hian - Andhadhun, Badhaai Ho, Padmaavat, Raazi, Sanju leh Stree-te an lang a, an buk a rit tlang hle dawn a ni. 

Bollywood superstar Deepika Padukone leh Ranveer Singh-te channa Padmaavat chu award dawng tur khan berah ngaih a ni a, Alia Bhatt leh Vicky Kaushal-te channa Raazi sawi bo theih a ni lo a, Karishma Tanna, Ranbir Kapoor leh Sanjay Duttte-te zarah Sanju chuan award a dawng a nih pawhin a mak lo ang. 

Best Director

He category-ah hian Bollywood filmmaker ṭha ber ber an lang a, Stree siamtu Amar Kaushik chu mimala langsar a ni. Ani bakah hian - Amit Sharma (Badhaai Ho), Meghna Gulzar (Raazi) leh Rajkumar Hirani (Sanju)-te an la awm cheu a, Padmaavat film siamtu Sanjay Leela Bhansali pawh sawi hmaih chi a ni lo bawk. 

Best Actor & Actress

Critics’ Award For Best Actor leh Actress huangah hming langsar ber ber an lang a, a hmei apain an ṭha tlang hle. Mipa lamah Ranbir Kapoor chu chawimawina dawng tura rinkai niin, Ranveer Singh nen an buk a rit dawn hle a ni. 

Hmeichhe lamah - Alia Bhatt leh Deepika Padukone-te chu rinkai niin, a khawi zawk zawk pawhin award an humhaw a nih pawhin a mak loang. 

Best Action

India mipuiin action film an dahsang a, en pawh a hlawh ṭhin hle. Filmfare Award sem leh turah pawh hian mipui ngaihven ber pakhat a ni leh dawn a, a ngaihnawm dawn. 

Tiger Shroff leh Disha Patani-te channa Baaghi 2 chu rinkai ber a ni a, award a dawng a nih pawhin a mak lo ang. Baaghi 2 hi India Box Office-ah pawh a che ṭha a, pawn lamah a hlawhtlinna hi a chhawm nung thei ang em tih chu hriat chakawm tawh tak a ni. Padmaavat leh Simba-te chu Best Action atana thlan theih zingah hian an tel bawk. 

Filmfare Award hi kum 1954 aṭang khan sem ṭan a ni a, Bollywood khawvelah chuan award hlun leh ngaihhlut berte zinga mi a ni. Kuminah pawh a vawi 64 nan sem a ni leh dawn ta a, a boruak pawh a lian sawt hle a ni. 



Share this Post

Login to comment
No Comments