Ranbir Kapoor leh Deepika Padukone Ramp an zawh dun dawn

Bollywood star zinga boruak nei hot ber pawl Ranbir Kapoor leh Deepika Padukone te chu April 19 khian Mijwan Fashion Show-ah an inlan dawn a, ramp an zawh dun dawn avangin a boruak a lian hle. 

Indian fashion designer zinga thiltithei ber pawl Manish Malhotra chuan Mijwan Fashion Show hi a buatsaih dawn a, milar eng emaw zat an inlan dawn. Ranbir Kapoor leh a bialnu hlui Deepika Padukone te inlan tur hian ngaihven a hlawh hle.

Ranbir chuan he mi chungchang hi a lo sawi tawh a, "Hmeichhiate dinhmun chawikan kawngah hma lak a ngai a, a bikin thingtlanga chengte hmasawna ngaih pawimawh a ngai a ni. Mipa leh hmeichhiate hi kan intluktlang a ni tih hi kawng chi hrang hranga lantir a ngai a ni" tiin, Fashion Show-a an inlan tur pawh hmanraw ṭangkai a nih thu a sawi. 

Hetih lai hian Deepika pawh a ngawi mai mai bik lo a, a phur tawh thu a sawi uar hle. Padmaavat actress chuan, "Tun hmain ramp ka lo zawh ve tawh ṭhin a, tun ṭum erawh ka phur kher mai. Manish Malhotra hi mi bik a ni a, tun ṭuma show neih turah pawh hian khawpui leh thingtlang mite inthlauhna a rawn tarlang leh ngeiin ka ring a ni" tiin, Ranbir ang thoa thingtlang hmasawnna a ngaih pawimahw thu a sawi. 

Ranbir leh Deeepika te hian an taksa lamah harsatna an tawh avangin Mijwan Fashion Show neih hun tur hi sawn hlat a ni a, April 19 hian neih a ni dawn ta zawk a ni. Bollywood star pahnih inlan tur hi Fashion Industry tan chuan thu lawmawm tak a ni ngei ang. 



Share this Post

Login to comment
No Comments