C. Sanga pualin 'Nghilhloh Zan' hmang dawn

Music Domain Mizoram (MDM) chuan tun hnaia an member boral  C.Vanlalsanga (C. Sanga) pualin December 14 hian Vanapa Hall-ah ‘Nghilhloh Zan’ an buatsaih dawn. He hunah hian C. Sanga sunna tawi neih a ni ang a, a hlimthlate thlirho a ni ang. 

C. Sanga Tribute Concert hi zan 7:30-ah ṭan a ni dawn a, ama pualin hun hman a ni ang. C.Sanga hi MDM hruaitu hlun niin, kum 2016 term-ah khan president a ni. Amah hi MDM tana mi ṭangkai tak a ni a, a thih ni thleng hian executive member a ni. Hei hi MDM chuan hriain a pual hian 'Tribute Concert' pawh hi an buatsaih dawn a ni. MDM President B. Lalsawmzuala (Te-a Boitlung) chuan, "C.Sanga hi MDM tana mi ṭangkai tak niin, president pawh lo ni tawh a nih vangin a puala hun buatsaih hi kan tihturah kan ngai a ni" tiin, he hun an buastaih tur chhan a sawi.

He Tribute Concert “Nghilhloh Zan” ah hian ticket a awm dawn lo va, 'RALNA BAWM' hun a ni ang. C. Sanga ngainatu leh a hla lo hlut ṭhin zawng zawngte chu kal vek turin MDM chuan a sawm a ni. Programme pawh phuisui leh zahawm taka buatsaih tum a ni a, Varsangzuali Varte (Vari Varte) in a host ang. 

Sound leh Light system zawng zawng hi DELTA SOUND hman a ni dawn a, a programme tihlu leh tichangtlung turin LED WALL pawh hman tura ruahman a ni. Programme hi MDM Visual Media Partner, Zonet Cable Pvt. Ltd. chuan Live-in an pechhhuak dawn a ni. 

He hunah hian mal zai, band, choir leh MDM Group zai ngaihthlak tur a awm dawn a, hei bakah hian duet ngaihthlak tur a awm bawk ang. 



Share this Post

Login to comment
No Comments