Environment tichhe lo tur zawnga lo neih ngaihtuah

Science and Environment

Mihring ei leh in tur mamawh thar chhuahna kawngah ramsa, nungcha leh kan environment-in a tawrh loh theih dan tur ngaihtuahin, London-ah pawl lian tak tak an inhmukhawm a. He inhmuhkhawmah hian him zawka mihring ei leh in tur leh thar chhuah dante sawihoa ngaihtuah a ni.

London-a inhmuhkhawm hi Extinction and Livestock Conference a ni a, Compassion in World Farming (CiWF) te buatsaih niin, ram 30 aṭangin palai 500 chuang an kal khawm a ni. Khawvela ei tur siam chhuaktu lian ber ber leh zuar chhuaktu lian ber berte an tel a, McDonalds, Tesco, Compass, Sustainable Food Trust, Quorn leh WWF-te chu a langsar zual an ni. 

Ni hnih awh conference huaihawttu CiWF chuan intensive farming aṭanga kal pênna tur dang kan ngaihtuah vat loh chuan khawvel tan chhiatna rapthlak tak a thleng thei dawn a ni, an ti. Tun ang zela kan kal chuan tun kum 10 lo kal leh tur chhung hian nungcha hmun thuma ṭhen hmun hnih hi kan chân dawn nia tarlan a ni a, a chhan ber pawh mihring ei tur thar chhuah nana nungchate chênna kan tihchhiatsak zel vang a ni. 

CiWF-a an CEO, Philip Lymbery chuan, "Sa ei tur thar chhuah te, environment te, nungcha humhalh leh mihring hriselna chungchangte hi a inzawm vek a ni. Chhiatna zakhua a thlen lohna tur chuan mihthiamte an thawh ho a, thukhat vua-a hma an lak a ngai a ni," a ti. Farm-a vulh ran enkawl nana antibiotic an hman nasat avangin natna hrik zingah antibiotic haw tawh lo 'Superbug' an pung tial tial. Hei bakah hian ran vulh vawih leh êk aṭangin methane a chhuak nasa a, chu chuan khawlum zelah pawh nghawng a nei tham hial tawh a ni, a tibawk. 

Lymbery chuan, "Penguin te, sai te, keite te hi an tlem tawhin mang mai hlauhawmah an awm tih hi mi tam takin an hria. Mi tam tak tena an hriat loh thung chu sa man tlâwm zawk duh avanga ran kan vulh uar deuh deuh hian nungcha dangte a nekchepin dinhmun hlauhthawnawmah a dintir tih hi a ni," a ti. Ran kan vulh nasa tial tial a, hnim hring an ei nasat avangin ramsa, hnim hring ei chite tlatna an luahlan a ni. University of Texas-a mi, Raj Patel chuan, "Ramngaw tichereutu lianpui chu Industrial agriculture hi a ni. Chu chuan nungchate rêm thei dinhmunah a dintir nasa lehzual a ni," a ti ve bawk.

He conference-in a tum chu mihring ei tur thar chhuah belh zel chunga nungchate tawrh loh dan tur leh climate change thlentu siam lo thei ang bera thawh ho a ni. Thil dangin a tawrh tur leh tur loh ngaihtuah miah loa bawh lam bawh vak lo turtea inzirtir a ni.



Share this Post

Login to comment
No Comments