Congress-in sorkar hna 33% hmeichhe tan dah tiam

Congress president Rahul Gandhi chuan Lok Sabha inthlanpui lo awm turah hnehna an chang a nih chuan Congress kaihhruai United Progressive Alliance (UPA) chuan sorkar hna laknaah 33% chu hmeichhe tan a hauhsak dawn a, hei bakah hian Women Reservation Bill pawh an pass dawn tih a sawi. 

Nimina Chennai-a Stella Maris College for Women zirlaite nena huna an hmanhonaah Gandhi chuan UPA chuan Goods and Services Tax (GST) chu awlsam zawka kalpui dan tur siamin, tax rate pawh a tihhniam tur thu a sawi bawk. 

Zirlaite hian Rahul Gandhi hi zawhna hrang hrang an zawt a, Congress kaihhruai UPA-in economic lama hmasawnna tura ruahmanna a neih dan te, Jammu and Kashmir-a boruak muanawm siam a tum dan te, PM Narendra Modi-a kaihhruai NDA sorkar a hmuh dan leh Parliament-a Modi a kuah chungchangte an zawt. 

Gandhi chuan UPA in sorkarna a siam leh a nih chuan Women's Reservation Bill chu pass a ni ngei dawn tih sawiin, central leh state sokar hnuaia hna lakah 33% chu hmeichhiate tan hauhsak a ni dawn tih a sawi bawk. 

Congress president chuan PM Modi chu mimala huatna a neih loh thu a sawi a, "Eng sakhua pawh - Hindu, Islam leh Kristian-ah pawh hmangaihna hi an innghahchhan vek a ni. Prime Minister-in Parliament-a thu sawi a, ka pa, ka pi, ka pu leh Congress party nasa taka a sawisel lai ka lo thlir a, ka rilru chhungrilah chuan huatna ka nei lo. A thinrim em vang khan khawvel mawina hi a hmu thei lo zawk a ni" tiin, Modi chuan a duh ang hmangaihna chu a nei lo nia a ngaih thu leh, hmangaihna lantir a duh avanga va kuah a nih thu a sawi bawk. 

Kum 2014 inthlanpuia UPA an tlawm khan zirlai tam tak a zir thu Gandhi chuan a sawi. "Modi hnen aṭang hian thil tam tak ka zir a ni. Thil zirtirtu che u chu in haw thei dawn em ni?" tiin zirlaite chu a zawt let nghal a ni. "Min zirtirtu pui ber chu min beitute hi an ni. Min beih nasat poh leh hmangaihna leh ngainatna lantir nasat mai tur a ni" a ti. 

J&K-a muanna a awm theihna tur chuan state mipuite nena inpawhna ṭha siam hmasak a ngai tih sawiin, hei hi kum 2004-2014 inkar khan UPA sorkar chuan a lo kalpui tawh a, firfiak pawikhawihna pawh tlahniamin, mipuite chu inthlan buatsaih tura thuneihna pek an ni tih a sawi. 

Economy ṭhanmawh bawk chu hleihluak taka mi hausate duhsakna lantir leh eirukna a nih thu Rahul Gandhi chuan a sawi bawk. 



Share this Post

Login to comment
No Comments