Vawiinah Rajasthan leh Telangana state inthlang dawn

Vawiin hian Rajasthan leh Telangana state-ah assembly inthlan neih a ni dawn a, December 11-ah vote tlate hi chhiarin result puan nghal a ni ang. 

Assembly seat 119 awmna Telangana leh seat 200 awmna Rajasthan-ah hian zing dar 7 aṭanga tlai dar 5 thleng vote thlak theih a ni dawn a ni. Rajasthan-a Ramgarh constituency-ah chuan Bahujan Samaj Party candidate Laxman Singh a thih avangin vote thlak hun hi sawnhlat a ni. 

Rajasthan :

Rajasthan-ah hian vote nei mi vaibelchhe 4.77 an awm a, assembly seat 119-ah candidate 2,274 an awm. Candidate zingah hian hmeichhia 180 an awm. 

Rajathan Election Watch (REW) leh Association for Democratic Reforms-in candidate 2188-te affidavit an zirchianna aṭangin, candidate zinga 608 chu national party ami niin, state party aṭangin candidate 209, registered unrecognized party aṭangin 584 leh independent candidate 787 an awm a ni. Candidate 106-te affidavit kimchang chu election commission website-ah upload a nih loh avangin zirchian theih a ni lo. 

Candidate zirchian zinga 320 (15%) chu thubuai neilai an ni a, thubuai lian tham nei candidate 9% an awm bawk. Party hrang hrang zingah Congress party candidate zingah thubuai neilai an tam ber a, 22% an awm. BJP-in dawtin thubuai neilai 17% an awm a, AAP candidate 18% leh BSP candidate 17% te chu thubuai neilai an ni bawk. 

Vote thlakna tur polling booth 52,000 siam niin, constituency tinah hmeichhiate pual bika booth siam pakhat ṭheuh a awm bawk a ni. Vote thlakna tur hian EVM leh VVPAT khawl nuai 2 chuang dah a ni.Tun ṭumah hian a vawikhatna atan VVPAT hi hman a ni dawn a ni. 

Rajasthan-ah hian rorellai BJP leh eptu Congress party chu inbei ber tura ngaih an ni. BJP hian state 200-ah hian candidate dah vekin, Congress hian seat 195-ah candidate a nei a, seat 5 dang chu a thawhpui  RLD, JD  (Sharad Yadav faction ) leh NCP tan a kian. BSP-in seat 197-ah a chuh dawn bawk a, AAP pawhin a ṭum khatna atan Rajasthan inthlanah hian chuhin, bial 194-ah candidate a nei. 

Kum 2013 inthlanah khan BJP chu hneh taka thlan tlin niin, seat 163 a la a, rorellai Congress party chu chiang takin paihthlak a ni. Akshok Gehlot kaihhruai Congress hian seat 21 chauh a la pha a ni. 

Telangana :

Telangana-ah hian vote nei mi vaibelchhe 2.80 an awm a, assembly seat 119-a inthlan neih turah hian candidate 1,821 an awm a, an zingah hian hmeichhia 136 an tel. Vote thlakna tur polling booth 32,815 siam a ni. 

Inthlanna muanawm leh boruak ṭha a awm theihna turin venhim hna thawk turin Central Armed Forces company 290 leh state police 30,000 dah an ni. 

Telangana Election Watch leh Association for Democratic Reforms-in candidate 1,821 zinga 1,777 te affidavit thehluh an zirchianna aṭangin, candidate zinga 231 chu thubuai neilai an ni a, heng zinga paruk chuan tualthah thubuai an nei a, 26 chu tualthah tuma puhna thubuai neilai an ni bawk. Candidate pali chu inrukna thlenga inhnamhnawiha puhna thubuai nei an ni bawk a ni. 

BJP candidate zinga 44% chu thubuai neilai niin, Congress party aṭangin 69%, TRS aṭagin 65% leh BSP candidate aṭangin 27% thubuai neilai an awm. 

Candidate zinga 367 chu national party ami nin, state party aṭangin candidate 268, registered unrecognized party aṭangin 490 bakah independent candidate 652 an awm bawk. 

Kum 2014 assembly inthlanah khan TRS chuan seat 63 lain vote tla aṭangin 33% a hmu a, Congress-in seat 21 lain vote 24% a hmu bawk. TDP leh hetihlaia a thawhpui BJP chuan seat 15 leh seat 5 lain, an pahniha vote an hmuh zat hi 21% a ni. 



Share this Post

Login to comment
No Comments