Karnataka : Party malah BJP in seat la hnem ber Congress leh JDS in ṭangrual sorkar siam tum

Karnataka Assembly inthlan result chu nimin khan puan a nia, party malah BJP chuan seat an la hnem ber a, mahse party mala sorkarna siam thei tur seat a nei pha lo. Congress party chuan ṭangrual sorkar siam turin Prime Minister hlui Deve Gowda kaihruai Janata Dal Secular (JDS) party a thawhpui dawn. 

BJP in party mala sorkarna a siam theih dawn tak loh avangin Congress chuan JDS a thawhpui tur thu a puang nghal a, Congress-JDS thawkdun tur hian chief minister atan Deve Gowda fapa HD Kumaraswamy chu an pawm a, a deputy tur chu Congress lamin Dalit hruaitu an ruat thung ang. 

Assembly inthlan neih hma khan Congress leh JDS hian thawhdun an duh lo a, mahse party mala sorkarna siam thei an awm tak loh avangin nimin tlai khan Congress president hlui Sonia Gandhi chuan Deve Gowda hi biain, thawhdun an remti ta a ni. Congress hruaitu hlun Ghulam Nabi Azad chuan Deve Gowda leh Kumaraswamy hi telephone-a an biak nghal thu sawiin, thawkdun tura rawtna an siam pawh an pawm tih a sawi. Governor hnenah ṭangrual sorkar an siam theih tur thu hi ziakin an thlen dawn a, sorkar siam tura Governor kohna an nghak tawh dawn tih a sawi. Mahse Governor chuan result kimchang tihchhuah anih hma chuan sorkar siam tur chungchangah eng party mah a ko dawn rih lo tih a sawi. 

Hetih lai hian BJP pawhin JDS hotute hi biak an tum ve tho a, nizan dar 6 khan hmalak zel dan tur ngaihtuahin Delhi-a party headquarters-ah BJP Parliamentary Board an ṭhukhawm nghal a ni. BJP chief minister candidate BS Yeddyurappa chuan Congress-JDS inbiakna kal zel chu an ngaihchan tur thu a sawi. 

Karnataka Assembly seat 225 awma seat 222-ah inthlan hi buatsaih a, sorkar siam tur chuan seat 112 neih phak a ngai a ni. BJP hian seat la hnem berin seat 104 la mah se party malin sorkarna a siam pha ta lo a ni. Congress party chuan seat 77 lain, JDS hian seat 39 an la a, independent MLA pahnih chuan Congress kaihhruai  hi an thlawp tur thu an sawi bawk. 

Assembly inthlanah hian BJP chuan seat la hnem ber mah se, Congress vote hmuh zat a tam zawk thung. Congress party hian vote tla aṭanga 38% a hmuh phak laiin, BJP vote hmuh zat hi 36.7% a ni. 

Chief Minister leh Congress hruaitu, Siddaramaiah chu Chamundeshwari bialah a chak zo lo a, mahse Badami bialah erawh a chak thung. Siddairamah hian an party chak loh a pawm thu sawiin, nimin tlai dar 4 khan Governor  hnenah banna a thehlut a ni. 



Share this Post

Login to comment
No Comments