SC-in anti-Sikh riot case chhui tur SIT din leh dawn

Kum 1984-a kha tih laia prime minsiter Indira Gandhi  kahhlum a nih hnua Sikh hnam beihna, ṭum 186 zet thleng chungchang chhui ṭha leh turin Surpeme Court chuan member pathum awmna, Special Investigation Team (SIT) din thar leh a remti. 

Chief Justice of India Dipak Misra kaihhruai bench chuan sorkar laipui hnenah SIT member tura rawt duh a neih hming chu pe thuai turin a hrilh nghal bawk. 

Committee member atan hian high court judge hlui pakhat, DIG rank chin police officer hlui pakhat leh police officer ṭanglai pakhat dah an ni dawn niin bench chuan a sawi. 

Sikh hnam tualvuakna thleng chungchang thubuai 241 chu khar ni tawh mah se, heng zingah 186 chu hawn thar leh a ni dawn a ni. 

Kum 1984, October 31-a a Sikh bodyguard-in Indira Gandhi a kahhlum hnuah khan ramchhung hmun hrang hrangah Sikh hnam beihna nasa tak a thleng zui a ni. Sikh hnam tualvuakna thlengah hian mi 3,325 zet an thi a, Delhi khawpui bikah mi 2,733 thah an ni. 

Sikh hnam tualvuakna thleng hi kum 1987 hnuah India rama chi inbeihna thleng rapthak  ber zinga mi nia sawi a ni. Human Rights Watch chuan kum 2011 World Report-ah khan sorkarin Sikh hnam suatna thlenga mawhphurtute chungah hma ala  lak loh thu a tarlang a ni. 



Share this Post

Login to comment
No Comments