TN transport worker-te nuar chhunzawm zel

Tamil Nadu-a transport worker-ten an hlawh san phuta nawrh an huaihawt chu an la chhunzawm zel a, ni riat an nuar tawh a ni. 

Tranpsort union-te nawrh huaihawt vang hian public bus a tlanchhuak thei lo a, hei vang hian mipuiten veivahna kawngah harsatna an tawk nasa hle. Transport department chuan service chhunzawm a nih theih nan driver dang an chhawr a, mahse bus-te hi an vaiin an tlanchhuak thei lo a ni. MLA tan pawh special bus tlantir a ni bawk. 

Eptu pawl,  Dravida Munnetra Kazhagam (DMK) working president MK Stalin chuan Tamil Nadu Chief Minister Edappadi K Palanismany hnenah nawrh huaihawt vanga mipuiten harsatna an tawh nasat avangin transport union aiawhte chu bia a, inremna siampui dan kawng ngaihtuah thuai turin a ngen. Transport Minister MR Vijayabaskar chuan bus khalhtute chu an hna thawk chhunzawm turin a ngen bawk. 

Transport worker te hian a hlawh tisang tur leh an hlawh tangte pechhuak vek turin sorkar hi an phut a ni. Worker-te hian an hlawh hi Rs 30,000 a tihsan an phut a, mahse thuneitu lam chuan thla khatah Rs 24,400 a pek an rawt thung. Nawrh huaihawtte leh sorkar aiawhte hi ṭum eng emaw zat inbe tawh  mah se, inremna an la siam thei lo a ni. 



Share this Post

Login to comment
No Comments