J&K-ah chin hriat lohin sipai panga awm

Jammu and Kashmir-a Gurez sector-ah nimin zing khan vur nasa takin a tawlh a, he thil thlen hnu hian chin hriat lohin sipai panga an awm.

Indian Army senior official chuan sipaite hi Bagtoor area-a Mani Post a awm an ni a, vur tawlh hian he post hi a chhilh niin a sawi. Sipaite chhanchhuah hna thawh nghal a ni a, mahse vur a sur nasat avangin hna an thawk chak thei lo niin a sawi. 

Kashmir Valley-ah hian nimin khan vur a sur leh a, Srinagar-ah pawh kumin chhunga a ṭum khatna atan vur a sur leh a ni. Pahalgam leh Gulmarg-a hill resort-ah te pawh vur a sur bawk. Vur sur vang hian Srinagar-Jammu National Highway chu khar a ni a, Srinagar airport pawh khar lailawk a nih avangin ramchhung hmun dang aṭanga tlawh pawh theih lohin an awm mek a ni. 

Meteorological department chuan Srinagar-ah hian cm 3.5-a chhahin vur a sur a, khawvawt lam pawh minus 0.2 degree a tling tawh niin a sawi. MeT department chuan December 12-15 inkar hian Jammu and Kashmir hmun hrang hrangah ruah leh vur nasa takin a sur dawn niin a sawi bawk. Police-te chuan district hrang hrangah vur leh ruah surin harsatna a thlen thuta ṭanpuitu kohna turin helpline an siam vek a ni. 



Share this Post

Login to comment
No Comments