Vice President atan Venkaiah Naidu lalut

India Vice President 13-na atan nimin khan M Venkaiah Naidu chu rinawmna thu tiamtira lakluh a ni. Lakluh inkhawm hi Rashtrapati Bhawan-a Durbal Hall-ah neih a ni. 

Kar hmasaa vice president thlanna neihah, rorellai BJP kaihhruai NDA candidate Venkaiah Naidu hian eptu candidate inṭawm, Gopalkrishna Gandhi a hneh a ni. 

Vice president atana lakluh a nih hmain Naidu hian Raj Ghat-ah kalin Mahatma Gandhi zahna a hlan a, a hnuah Jan Sangh leader Deendayal UPadhyaya, Dr BR Ambedkar leh Sardar Vallabhai-te zahna a hlan bawk. 

President Ram Nath Kovind chuan vice president thar hi rinawmna thu tiam tirin a lalut a, lakluh inkhawmah Prime Minister Narendra Modi, President hlui Pranab Mukherjee, PM hlui Manmohan Singh leh party hrang hrang MP-te an tel a ni. 

Naidu hian ram chhunga constitution post sang ber dawt a chelh dawn a, Rajya Sabha chairman a ni bawk ang. BJP hruaitu zinga Bhairon Shekhawat (2002-2007) hnua vice president ni leh thei hmasa ber a ni a, kum 68 mi Naidu hi vice president ni tawh zingah India Independence hmuh hnua piang awmchhun a ni bawk. 

Prime Minister Narendra Modi chuan mi inngaitlawm tak, thingtlanga seilianin India rama dinhmun sang tak a chelh ta tih sawiin, hei hian India ram danpui chakzia leh democracy puitlin zia a lantir a ni, a ti. Loneitu fapa, Naidu chuan a chawr chhuahna a hrereng a, thingtlang mi leh loneitute chu a thinlungin a hnaih reng a ni, a ti. Naidu chu India ram dinhun sang zawka hruai theitu tur a nih thu a sawi bawk. 



Share this Post

Login to comment
No Comments