Vawiin-ah President thlang dawn

India ram President thar tur chu vawiin hian MP leh MLA-te'n an thlang dawn. 

Election Commission of India chuan president thlanna tura hman tur hian a hranpain 'pen' ruahman a ni a, MP Leh MLA-te chu voting chamber-ah an mimal pen kenluh khapsak an nih thu a sawi. 

Parliament member-te chu vote thlakna ballot paper hring hmantir an ni ang a, MLA-te chuan ballot paper sendang an hmang thung ang. MLA-te vote hlut zawng hi an state mipui tam dan a zirin a danglam a, MP-te vote hlut zawng erawh chu a inang vek a, MP pakhat vote hlut lam hi 708 a ni ang. 

Electoral college vote hlut zawng belhkhawm hi 10,98,903 a ni. Electoral college-ah hian MLA 4,120 leh MP 776 an awm. MP 233 chu Rajya Sabha member an ni a, Lok Sabba member 543 an awm. 

Vote thlakna atan hian polling station 32 siam a ni dawn a, Parliament House-ah pakhat dahin, state tina legislative assembly-ah pakhat ṭheuh siam a ni bawk ang. EC chuan inthlanpui turin observer 33 a ruat a, heng zinga pahnih hi Parliament House-ah awmin, state assembly tinah pakhat ṭheuh dah an ni ang. 

Ballot box-te hi Delhi-ah dahin, July 20-ah vote tla hi chhiar a ni ang. 

President thar tur thlannaah hian NDA candidate Ram Nath Kovind leh eptu ṭangrual candidate Meira Kumar-i te an inkhing dawn a ni. 



Share this Post

Login to comment
No Comments