Rohingya raltlan tam takin Myanmar-a kir duh lo

Myanmar sipaiten Rakhine state-a beihpui an thlak avanga Bangladesh rama tlanchhia, Rohingya Muslim raltlan tam tak chuan Myanmar rama kir an duh lo. 

Kum 2017 August thla aṭang khan Bangladesh-ah hian Rohingya raltlan hi nuai 7 chuang zet an tlanchhe tawh a, Bangladesh chhim lama Cox Bazaar-a refugee camp-ah an awm a ni. 

Bangladesh leh Myanmar sorkar chuan raltlante hruaikirna tur hian inremna an siam tawh a, mahse hei hi a taka kalpui a la ni lo. Raltlan zinga mi, kum 60 mi Dil Mohammad chuan Myanmar-a thawn kir tur mi 2000 list an siamah a tel tih a hriatin sazu tur inin intihlum a tum a, mahse a nupui chuan an awmna bula Medecins Sans Frontieres Hospital-ah hruai nghalin an chhan hman a ni. 

Mohammad chuan an sakhua, Islam danah mahni intihhlum chu sual lian tak ni mah se, Myanmar-a hun rei tak chhung tihduhdah an lo tawrh tawhna hmuna kir leh ai chuan Bangladesh rama thih mai chu a thlang zawk niin a sawi a, Pathianin an thil tawrhte a hriatpui avangin intihlum mah se a ngaihdam a rin thu a sawi. 

Nikum October thla khan Bangladesh  leh Myanmar chuan raltlante hruaikirna tur hian inremna an siam a, mahse he ruahmana hi UN refugee agency UNHCR leh aids group dangte bakah raltlante ngei pawhin an duh lo a ni. Nikum November thla laihawla raltlan hruaikir hmasa tura tih, mi 150-te chu Myanmar ramah hian an kir duh lo a, anmahni hruai tura tirh motor-te pawh a ruakin an tlan kir leh a ni. 

Kumin February thla tawpah UN Security Council meeting neihah, Bangladesh foreign secretary Shahidul Haque chuan raltlante hruaikir an nih hmain Myanmar sorkar chuan Rohingya Muslim-ten hun rei tak chhung enhran leh tihduhdan an lo tawrh ṭhinte chungchang chu ngaihtuah a, an kir duhna tura boruak ṭha zawk siam a, an himna turte ngaihtuah sak turin a ti a ni. Boruak awmdan a la ṭhat loh vangin raltlan tumah an la kir duh lo tih a sawi. 



Share this Post

Login to comment
No Comments