British Parliament-in PM Brexit deal hnawlsak leh

British Parliament chuan Prime Minister Theresa May-in European Union aṭanga Britain inlakhranna tura inremna a siam, Withdrawal Agrement a siam chu a hnawlsak leh. 

Thawhlehni khan Parliament-ah May-i Brexit deal hi ngaihtuahin vote lak leh a ni a, mahse inremna thlawp lo lamah vote 391 tlain, a thlawp lamah vote 242 chauh a tla thung. MP-te hian January 15 khan Brexit deal hi an lo hnawlsak tawh a, hemi hnu hian May-i chuan inremna an siam ṭhenkhatte chu a siamṭha leh a, heti chung hian hnawlsak a ni leh ta tho a ni. 

March 19 hian European Union aṭangin United Kingdom hi a inlahrang tawh dawn a ni. 

Parliament-a Brexit deal hnawl a nih leh hnua thu a sawiah, PM May-i chuan MP-te hnenah an thutluka siam dan chu pawi a tih thu sawi. 

May-i chuan Brexit deal chungchangah vote vawi hnih lak leh a la tiam a, inremna siam hmasa loa EU aṭanga inlakchhuah duh leh duh loh chungchangah vote an la dawn a ni. Hei hi MP-te hian an pawm tlan loh chuan a tukah EU constitution Article 50 hnuaia UK inlakhranna tura inremna dang siamna tura hun pek belh dil chungchanga vote lak leh a ni ang. 

Labour party hruaitu Jeremy Corbyn chuan MP-te vote chuan May-in EU aṭanga chhuahna tura inremna a lo siamte chu awmze nei lo a ni tih a tilang tih sawiin, sorkar hnenah rawtna dang a siamte chu ngaihtuah zawk turin a ngen nghal. 



Share this Post

Login to comment
No Comments