Meeting-na aṭangin Trump chhuak

US President Donald Trump chu Democrats hruaitute nena an ram sorkar shutdown tihtawp dan chungchang ngaihtuaha meeting an neihna aṭangin a chhuak tau. 

Republican president leh Democrats hruaitu Nancy Pelosi bakah Chuck Schumer-te nen meeting an nei a, mahse US-Mexico ramri hungna bang siamna tura a sum phut chu an pawmsak duh loh chhunzawm zel avangin Trump hian meeting hi titawpin, a chhuahsan a ni. President Trump chuan meeting an neih chu hun khawhralna mai a nih thu a sawi. 

Schumer chuan Pelosi-in ramri hungna bang siamna tur sum a  phut chu a pawmsak thei dawn lo tih a sawi hnuah, President Trump hi meeting-na hmun aṭang hian a chhuak nghal niin a sawi. Trump lungawi lo hian dawhkante pawh a chum niin a sawi a, mahse hei hi Vice President Mike Pence chuan thu dik lo nia sawiin, President hi room chhungah lutin candy-te pawh a sem a, a awki a san leh dawhkan a chum nia Schumer-a sawi chu a dik lo tih a sawi. House-a Republican leader Kevin McCarthy pawhin Democrats-te awmdan leh thil sawi duhdan chu thil zahthlak tak a nih thu a sawi bawk. 

US sorkar hnuaia department ṭhenkhat chu hna thawk thei loin ni 19 chhung khar a ni tawh a, tunkar aṭang hian sorkar hnathawk zinga 80,000 vel chuan hlawh an la thei tawh dawn lo a ni.  December 22 aṭang khan fund awm loh vangin federal agency pakua chu khar a ni tawh a ni. 

House of Representatives Speaker Nancy Pelosi chuan sorkar hnathawk tam tak hlawh la thei loa an awm tur chu President Trump tan chhiatna a ni dawn tih a sawi a, mahse an chungchang hi President hian a ngaihtuah tak tak lo a ni, a ti. 



Share this Post

Login to comment
No Comments