Sri Lanka : Rajapaksa-an appeal court thupek khinglet

Sri Lanka-a Court of Appeal in Sri Lanka Prime Minister Mahinda Rajapaksa chu an ram prime minister anga a awm khapna thupek a tichhuak a, Rajapsak hian appeal court thupek hi Supreme Court-ah a khing let. 

MP 122-ten Rajapaksa an thlawp loh thu sawia case an thehluh behchhanin, Thawhṭanni khan Court of Appeal chuan Rajapaksa leh a cabient-te an position anga hna thawk lo turin a ti a ni. Hemi chungchang hi December 12 leh 13 hian court chuan a ngaihtuah leh ang. 

Appeal court thupek tihchhuah an khin let tur thu Rajapaksa chuan a sawi nghal a, Thawhlehni khan Supreme Court-ah an appeal-na hi an thehlut tih MP Gamimi Lokuge chuan a sawi. Rajapaksa chuan Court of Appeal-in cabinet-te hna thawk thei loa a siam chu an pawm thei lo tih an sawi. 

President Maithripala Sirisena-an prime minister aṭanga a bang, Ranil Wickremesinghe party, United National Party (UNP),  Janatha Vimukthi Peramuna (JVP) leh Tamil National Alliance MP 122 te chuan PM thar atana ruat Rajapaksa chu an thlawp loh thu leh, PM atana an pawm loh thu Court of Appeal-ah hian an lo thehlut tawh a ni. 

Court of Appeal chuan Rajapaksa cabinet member 49 te chu December 12 hian inlan a, Wickremesinghe thlawptu lam MP te petition thehluh chu chhang turin a ti a, hei bakah hian eng thuneihna nge an neih tih sawifiah turin a ti bawk. 

Wickremesinghe hian Parliament-ah majority ala nei nia sawiin, President-in PM aṭanga a ban chu dan kalh niin a sawi. A party, UNP hian Rajapaksa rin tawk lohna motion hi Parliament-ah vawi thum an pulut tawh a, PM thar hian fiahna hi paltlang zo lo mah se a bang duh chuang lo a ni. 

Hetihlai hian President Sirisena chuan an ram buaina chu chinfel a ni thuai dawn niin Thawhlehni-a Sri Lanka Freedom Party convention-ah a sawi. October 26-a PM aṭanga Wickremesinghe a ban chungchangah thil dik tak a ti niin a sawi a, an ram ṭhatna atana he thutlukna hi siam a nih thu a sawi. Parliament-a MP zawng zawng chuan Wickremesinghe chu thlawp  mah se PM-ah a dah dawn lo tih a sawi nawn leh bawk. 



Share this Post

Login to comment
No Comments