US firm hnenah dollar mtd 70 pe dawn

Malaysia sorkar chuan kum 2014, March 8 aṭanga chin hriat loha bo, Malaysia Airlines thlawhtheihna flight 370 black box emaw, a tla them emaw chu thla tum chhunga a zawn hmuh theih chuan US company, Ocean Infinity chu dollar maktaduai 70 a pe dawn tih a sawi. 

Flight 370 hi Kuala Lumpur aṭanga Beijing pana a thlawh laiin chin hriat lohin a awm a, hun rei tak zawn ni mah se hmuh a la ni lo a, nikum khan official-in bo zawn hna hi tihtawp a lo ni tawh a ni.  He thlawhtheihnaah hian mi 239 an chuang a ni. 

Malaysia sorkar chuan Houston, Texas-a hmunpui nei, Ocean Infinity company hi thlawhtheihna bo zawng tur hian inremna a siampui a ni. Transport Minister Liow Tioang lai chuan Ocean Infinity-in a tih ber tur chu a zawnna tura bial an ruahman, Indian Ocean chhim lamah thlawhtheihna tla them emaw, flight recorder zawn emaw a ni dawn tih a sawi. Thla thum chhungin hengte hi a hmuh hman chuan an zawnna huam chin zauh dan azirin lawmman  hi a pe ang, a ti. Ocean Infinity hian square km 5,000 bial a zawnna a hmu a nih chuan dollar maktaduai 20 pek a ni ang a, sq km 15,000 bial huam chhungah a hmuh chuan dollar mtd 30, sq km 25,000 bialah dollar mtd 50 leh zawnna tur bial an tih pawn lama a hmu a nih chuan dollar matkaduai 70 pek a ni ang. 

Ocean Infinity Chief Executive Oliver Plunkett chuan thlawhtheihna tla zawngtu tur lawnglian, Seabed Constructor chuan kar hamsa khan South Africa-a Durban lawngchawlh hmun chhuahsanin, January 17-ah Indian Ocean chhim lam hi a thleng dawn niin a sawi. 



Share this Post

Login to comment
No Comments