Israel-in Gaza tunnel danna bang siam

Israel chuan Gaza Strip aṭanga Palestinian helten leiverh an siam ṭhin danna tur bang a siam mek. 

Bang siam tur hi km 64-a thui niin lei hnuai meter 40-a thuk aṭangin siam ṭan a ni ang a, lei chung lamah meter 6-a sangin siam a ni ang. A siamna senso atan hian shekel tluklehdingawn 3 (US dollar maktaduai 833) vel sen a ni ang. 

Israel army commander chuan underground wall siam mek hi kum 2019-ah zawhfel hman beisei a nih thu a sawi. 

Gaza Strip-a rorel lai, Palestinian hel Hamas pawl hian Israel beihna atan leiverh, tunnel an siam fo a, Israel sipaite chuan leiverh 30 chuang an tichhe tawh a, kum 2014-a ni 50 an indo zawh hnuah a dang pahnih pawh an hmuchhuak leh tawh bawk. 

Kum 2014-a Gaza Strip-a ni 50 indo neihah khan Palestinian mi 2,251 an thi a, an zingah hian civil mi 1,462 an tel a, mi 11,231-in hliam an tuar  bawk. He indonaah hian Israle sipai 67 leh civl mi paruk an thi bawk a, mi 1,600-in hliam an tuar a ni. 

Israel Defence Forces (IDF) Major General Eyal Zamir chuan hmanraw ṭha tak nena thuam tur, underground wall siam hna hi ngawrh taka thawh a ni dawn tih a sawi a, Hamas-te'n dodal mah se siam a ni dawn tho tih a sawi. Hetih lai hian Hamas hruaitu, Ismail Haniyeh chuan an pawlin Israel pawhna tur leiverh hi an la siam chhunzawm reng niin a sawi. 



Share this Post

Login to comment
No Comments