Bayern leh Dortmund inkar a zim sawt

German champion nih tuma inum boruak a sang zel a, champion lai Bayern Munich-in 3-1 a hnehna an chan laiin an chunga awm leh hmahruaitu ni bawk Borussia Dortmund erawh Hoffenheim lakah an chak zo lo, 3-3 in an inhnehtawk. Lucien Favre-a enkawl Dortmund hian point nga chauhin hma an hruai fal ta.

Dortmund an chelh

German Cup aṭanga an tlak hnuah Borussia Dortmund-in insiamṭhat nghal an tum a, Werder Bremen hneh lo team aṭangin Signal Iduna Park-a Hoffenheim hmachhawn turin Favre-a'n a player panga a siksawi.

Jadon Sancho-a goal hmasa zawk an pawm loh hnuah, English rawlthar duhawmin hian minute 32-naah an goal hmahruai a khung ta tho a, chawlhlawk hmain Mario Gotze khung tur a thawh chhuah sak bakah goal ban a tih per bawk. Minute 66-naah Raphael Guerreiro hmangin Dortmund lamin an goal thumna an khung a, nuamsa taka chak thei tura ngaih an ni.

Mahse, mikhual Hoffenheim lamin Ishak Belfodil-a goal hnih (75', 87') leh Pavel Kaderabek (83') hmangin an chhang let a, hun tawp lam minute 15 chhung leka goal thum an chhuah avangin Dortmund lam hian uiawm takin point hnih an hloh a, champion an tumna a nghing zui nghal bawk.

Hoffenheim hian 2016 September thla khan Mainz lakah 4-1 a an hnufual hnuin an inhnehtawk pui leh thei a, he inkhelh hnuah chuan goal thum an phurh hnua an thawhchhuah lehna hmasa ber a ni.

Hmabak Spurs

February 13 zan hian Champions League last 16 khel turin Dortmund hian Premier League club Tottenham an lenchilh dawn a, English winger Sancho chuan Spurs hmachhawn tura an inpeih hman tur thu a sawi.

Kum 18 mi Sancho chuan, "Hoffenheim nen kan inhnehtawk hnu lawkah Dele Alli-a'n message min rawn thawn a, inhmachhawn tura kan inpeih tawh thu ka hrilh. Wembley-ah hnehna chan ngei kan tum dawn a ni," tiin ram tana a khelh pui player nen UCL chungchang an sawidun tawh thu a sawi.

England international Sancho hi kum 18 leh ni 321 mi chauh a la ni a, season kal laiah goal riat a khung tawh. Germany football inelna sang bera goal riat khung tling thei naupang ber a ni.

Lewy leh goal 100

Kum 2005 khan Allianz Arena chu hawn a ni a, he khelmual hmingthanga goal 100 khung tling thei hmasa ber chu Robert Lewandowski a ni. Bayern striker hian a club hi 3-1 in Schalke lakah hnehna a chanpui.

Inrinni zan inkhelah Schalke defender Jeffrey Bruma-a'n an mahni lama a tih luh vangin Bayern lamin hma an hruai a, mahse forward Ahmed Kutucu hmangin an si phurh an sut tho. Goal hnih a luh hnuah Bayern harh chhuakin Lewandowski bakah Arsenal winger hlui Serge Gnabry chuan goal khat khungin nuamsa takin hnehna an chang.

Bayern coach Niko Kovac chuan, "First half chhung khan kan khel ṭha hle, German Cup-ah minute 120 kan khel zo hlim a ni a, chumi hnu lawka hnehna kan chang leh thei hi a lawmawm hle," tiin a sawi.



Share this Post

Login to comment
No Comments