Champions League hmunruak pakhat inchuhtu Man United leh Arsenal an chak

Premier League hi an point dinhmun aṭanga thlirin hmuhnawm dan chi thum a awm a; nomawi inchuh, Champions League hmunruak inchuh leh relegation battle te a ni. An dinhmun thlirin English club lian pathum Manchester United, Chelsea leh Arsenal daih Europe inelna sang bera khelh theihna ticket a awm lo a, kum 2000 chhoa champion tuma inum ṭhin ho hian palina nih tumin an um a, ṭantu an ngah avangin ngaihven pawh a hlawh hle.

Inrinni zan khan Manchester United chuan Craven Cottage luh chhuahin Fulham chu 3-0 in an hneh a, Paul Pogba-a'n goal hnih a khung bakah Anthony Martial-a'n goal khat a khung ve bawk. Arsenal pawhin kumin 2019 chhunga a vawi khat nan khualmuala Premier League an khelhah hnehna an chang a, Alex Iwobi leh Alexandre Lacazette te goal hmangin Huddersfield Town 2-1 in an hneh. United leh Gunners hi point khat chauhin an inthlau a, an pahnih inkara tla zep Blues chuan nizan khan Manchester City an hmachhawn a, result kan hre hman lo.

French revolution

Arsenal vanglaia London club tihmingṭhatute chu French mi an ni a, Arsene Wenger kaihhruaina hnuaiah Patrick Vieira, Thierry Henry, Robert Pires, Sylvain Wiltord leh Emmanuel Petit te an pawimawh hle. Tunah pawh Arsenal-in French player Laurent Koscielny, Alexandre Lacazette leh Matteo Guendouzi te la ṭhatpui reng mah se tun dinhmunah tak chuan Manchester United-a French player awm an vul zawk.

Craven Cottage-ah Pogba chuan minute 14-na lekah Martial laka a ball hmuh chu a ke vei lamin goal-ah zawk a pet a, keeper Sergio Rico chuan cross turah ngaiin an chhuah. Minute 23-naah Martial a rawn inlar a, hetah erawh keeper dem theih a ni ta lo. Contract pawtsei zo hlim Martial chuan halfway line thlen hma hret aṭanga khalh ṭanin Fulham player pahnihin an dang zo lo a, goal ropui a khung.

Second half-ah Juan Mata-a'n fing takin penalty a hlawh chhuak a, Paul Pogba chuan goal-ah a chantir a, 3-0 a ni. Substitute Alexis Sanchez leh Scott McTominay ten goal dang khung belhna hun ṭha an hlah a, Ole Gunnar Solskjaer hoten inkhel an thunun a, an phu angin 3-0 in an chak.

Arsenal an ṭha tawk

Arsenal manager Unai Emery-a'n John Smith's Stadium-ah Mesut Ozil, Aaron Ramsey leh Pierre-Emerick Aubameyang te a chhawr lo a, Henrikh Mkhitaryan a rawn kir thung.

Armenia international Mkhitaryan hian goal khung lo mah se goal nawrna tura an thahrui pawimawh a ni. Gunners-in khualmuala an result ṭha lo siam ṭha turin bul an ṭha ṭha a, minute 16-naah vei lam aṭanga Saed Kolasinac cross chu Alex Iwobi-a'n a volley lut a, minute 44-naah 'Arsenal class' langin Mkhitaryan leh Ainsley Maitland-Niles te thawhrah sengin Alexandre Lacazette-a'n chiang zetin a khung.

Amaherawhchu, Gunners-in goal khung theihna hun ṭha an hlah zui avangin hun tawp lamah an tlarhnung player-te an talbuai a, injury time-ah ṭang khawng thei loin Kolasinac-a'n an lamah a tilut. 2-1 in inkhel a tawp a, Emery hote hi Champions League khel thei zinga aṭanga dah bo a la thiang lo.

Palina chu

Manchester United-in hnehna an chan avangin palinaah an awm a, amaherawhchu nizan inkhel result a zirin Chelsea-in an rawn lehthal thei a, tun dinhmunah chuan eng team pawhin palina dinhmun hauh se season tawpa palina hauh tur a chiang lo.

Arsenal manager Unai Emery chuan, "Match 26 khelh hnuah Man United ten kan inthlauhna chu point khat chiah a ni, a sang pali zinga tel hi a awlsam dawn lo. Mahse, kan thei a ni tih kan hriat a ngai a, kawng dik kan zawh zel ang," tiin a sawi.

Gunners hian Ningani zanah Europa League round of 32 khel turin BATE an lenchilh dawn a, FA Cup-a an tlak tawh avangin February 21-a Belarusian club an tlawh leh hmain match dang khelh tur an nei lo.

Manchester United hian Premier League-a an hmachhawn leh hmasak ber tur chu Liverpool a ni a, hemi hma hian PSG (Champions League) leh Chelsea (FA Cup) te an hmachhawn dawn avangin match khat lekah Solsjkaer-a hote hi paruknaa awm leh thei an ni.

United boss Ole Gunnar Solskjaer chuan, "Hmasawn zel hi kan duh a, palina dinhmun sawhnghet hi kan duh. Hnehna chan hi a nuam a, min ṭantute pawh kan khelh danah an lawm ang," tiin Champions League-a khelh a duh thu a sawi.



Share this Post

Login to comment
No Comments