Mizo hmel a mawi Jeremy, Jacob leh Zakhuma ten gold an la

Mizo rawlthar rit chawi chak Jeremy Lalrinnunga, Jacob Vanlaltluanga leh Zakhuma te chuan nimin khan Khelo India School Games neih mekah gold medal an chawi chhuak vek!

Gold pathum

Pune, Maharashtra-a inelna neihah Youth Olympic Games gold medalist Jeremy-a chuan 67kg huangah khelin, snatch 122kg, clean & jerk 156, a total-ah 278 chawiin Under 17 huangah gold medal a la a, Under 21 huangah erawh silver medal a la thung.

U-17 huanga an chawi hi U-21 atan an ring nghal. Mahse, snatch an chawi zawh hnu, clean & jerk an chawi hmain an ring tlang dawn tih an hre chauh a, hei vang hian Jeremy-a'n snatch bikah a theihna sang ber a hmang lo a; gold la tura a chawi chu U-21 atan gold lak nan a tawk lo, a chungah world championship-a bronze medal la tawh Gulam Navi a awm.

SYS coach Malsawma Khiangte leh Zarzokima te chher chhuah Jeremy bakah hian Jacob Vanlaltluanga chuan 61kg huangah khelin, ani hian snatch 114kg, clean & jerk 139, total-ah 253 chawiin; Under 17 bikah gold medal a la.

Zakhuma pawhin 61kg huang tho, Under 21 bikah snatch 114kg, clean & jerk 140, total-ah 245 chawiin gold medal bawk a la a, hemi huangah bawk hian Jacob Vanlaltluanga hian silver medal a chawi chhuah bakah, Mizo weightlifter dang Lalhunthara (Under 17) chuan bronze medal a la ve bawk.

Lawmthu

Nikum October thla khan Jeremy hian Indian athlete zinga a hmasa ber ni turin Youth Olympic-ah gold medal a la a, nikum khan an in zir mekna Maharashtra tan khelin Khelo India-ah hian gold medal a lo la tawh bawk.

Govt. Complex rawlthar Jeremy chuan, "Duhthusam ang vekin thil thleng lo mah se kan thlen chinah kan lawm a, hei leh chen min hruaitu Pathian chungah lawmthu kan sawi," tiin Vanglaini a hrilh. Jacob-a pawhin Mizo pathumin India ram pum huap inelna huanga gold medal pathum an la thei chu lawmawm a tih thu a sawi ve bawk.

Vanglaini zawhna chhangin Mizoram coach Malsawma Khiangte chuan, "Naupang an nih lai aṭanga kan enkawl leh hriatchian ten gold medal pathum an la mai hi a ropui ka ti, nakin zelah pawh senior huangah hlawhtlinna sang zawk an chan theih ka duhin ka beisei pui hle," tiin a sawi. 

Mizoramin weightlifting bikah chauh gold medal pathum, silver medal pahnih leh bronze medal pakhat an la nghal a, nimin tlai thleng kha chuan table-ah pathumna an ni. Hmahruaitu Maharashtra chuan gold medal pakua la tawhin, a pumpuiah medal 18 an la tawh.



Share this Post

Login to comment
No Comments