Spurs stadium hman hun tur chiang thei rih lo

Tottenham chuan an beisei angin an khelmual thar White Hart Lane chu an hmang hma thei dawn lo. Club chairman Daniel Levy chuan March thla hma chuan an hman theih dawn loh thu a sawi chiang.

Season hmasa aṭang khan Tottenhman hian an khelmual an siamṭhat avangin Wembley Stadium chu home match khelh nan an hmang a, September thla khan luah theih inbeisei mah se venhimna kawngah a la ṭha tawk loa an ngaih avangin an hmang thei lo.

Stadium thar hi mipui 62,062 lenna tura siam a ni a, Wembley Stadium chhunga fans thawl tak hnuaia inkhelh ai chuan mahni khelmual ngei a khelh hlan an nghakhlel tawh hle.

Tottenham chairman Daniel Levy chuan, "Beisei ang huna kan inepeih hman loh avangin fans chungah ngaihdam ka dil nawn a, chutih rualin an dawhtheihna vangin an chungah lawmthu ka sawi bawk. Tun aṭanga chawlhkar hnih emaw thumnaah chuan kan dinhmun tur a chiang tawh ang," tiin a sawi.

Pathianni zan hian Spurs-in Manchester United an mikhual dawn a, hei bakah hian Premier League match dang Watford, Newcastle leh Leicester te nen an khelh hunah Wembley Stadium an hman chhunzawm a ngai rih dawn. Champions League last 16-a Borussia Dortmund an mikhual tur leh, FA Cup fifth round an lut a nih pawhin tuna an hman laiah hian an khelh a ngai dawn.



Share this Post

Login to comment
No Comments