Old Trafford-a inhnek duhtu Fury

British boxer rothap Tyson Fury chuan WBC heavyweight rematch Deontay Wilder nena an neih turah an inhnekna tur hmun chu Manchester United khelmual Old Trafford ni se a duh thu a sawi. 

Kum 30 mi boxer hian Los Angeles khawpuia Wilder nen an inhnek ṭumin chak zawkah ngaih ni mah se inhnehtawkah puan an ni a, Fury hian inhnek nawn a duh thu sawiin Wilder pawhin a pawm ngei dawn niin a lang. 

Manchester khaw chhuak boxer Fury chuan, "Ka promoter Frank Warren chuan Arsenal-ah inhnek tir min duh a, mahse Old Trafford ka duh thu ka hrilh a ni," a ti. 

Fury hian Nilaini zana Manchester United leh Arsenal inkhel chu a hmunah a en a, a result beisei an zawh chuan,"Kei chuan draw result hi ka ngaina lo a, hnehna chan ka duh," tiin Wilder nena an inhnek nen inrem takin a sawi zawm. 

Wilder chuan rematch chungchangah hian, "Fury ṭha ber chu in hmu tawh a, mahse Wilder ṭha ber erawh in la hmu lo. Mi tam tak buaina chingfel tur hian inhmachhawn leh thuai thuai ka duh a ni," a ti. 

Boxer pahnih ṭawngkam aṭanga thlirin fighter rothap pahnih hi an intawng leh ngei dawn niin a lang a, Old Trafford-ah ngei an inhnek a nih pawhin a mak lo ang. 



Share this Post

Login to comment
No Comments