Henry enkawl Monaco an chak zawn

Thierry Henry enkawl AS Monaco chuan a vawi hnih nan chak ni hmel an hmu ve leh ta. Thawhlehni zan French Ligue 1 inkhelah striker Radamel Falcao-a penalty vawi hnih chhuih luh hmangin Amiens 2-0 in an hneh a, relegation zone an chhuahsan rih.

Season hmang fuh lo Monaco hian an manager hmasa Leonardo Jardim an ban tawh hial a, a thlaktu Henry pawhin danglamna a thlen nghal thei mai chuang lo. Champions League aṭanga tla fel chiang hmasa ber an nih bakah league lamah pawh an ropui chuang lo.

Mahse, Monaco hian an ropui tawh ṭhinna ang kha neih let an duh a, huaisen takin thawhchhuah an tum. Tun hnai an league match hnuhnung pathumah vawi hnih an chak ve ta a, point 13 hmuin table-ah 17-na dinhmun luahtu an ni mek.

Inkhel dangah Lille chuan Montpellier 1-0 a hnehin point 30 an hmu ta a, pahnihna dinhmunah an inhlangkai. Hmahruaitu Paris St Germain an phak lohna chu point 13 a ni a, nizan khan champion lai hian Strasbourg an hmachhawn a, an result a zirin an inkar point hi a la danglam leh thei.



Share this Post

Login to comment
No Comments