Hazard inrempui turin Chelsea a inpeih

Chelsea manager Maurizio Sarri chuan tun hnaia Real Madrid nena sawizawm hlawh Eden Hazard chelh turin club chu a inpeih thu a sawi a, Hazard-a thutluknaah engkim a innghah thu a sawi.

Stamford Bridge-a June 2020 thleng cham tura contract nei Hazard hian Chelsea a cham zel leh Real Madrid pan chungchangah a rilru a buai thu tun hnaiah a sawi a, Blues fan-te ngaih a ṭha thei lo. 

Sarri chuan, "Eden hi cham turin ka duh a, mahse aman cham zel a duh chauhin chelh ka duh. Contract thar ziahpui nghal turin club lam chu kan inpeih a, mahse engkim hi a thutluknaa innghat a ni," a ti.

Italian manager chuan AC Milan nena sawizawm hlawh mek Cesc Fabregas leh defender David Luiz te contract thar ziahpui a duh thu a sawi bawk a, a player pahnih an cham theih nan chuan club pawhin a policy neihlai thlak se a duh!

Luiz leh Fabregas te hi season tawpah chuan kum 32 mi an ni tawh dawn a, season tawp rualin an contract a zo nghal dawn bawk - Chelsea hian kum 30 chuang tawh player te chu kum khat aia tam contract an ziahpui ngai lo. 

Sarri chuan, "David leh Cesc te hi kan chelh theih ka beisei. Club-in contract rei lo zawk ziahpui a duh a, player-in contract rei zawk an duh a, kan buaina hi chinfel thuai a nih theih ka beisei. Luiz ang level centre back zawn hmuh a har ang chiah Fabregas te anga theihna nei midfielder zawn hmuh a har dawn a ni," tiin a player te an chelh loh chuan a thlakna tur zawn hmuh a har tur thu a sawi.



Share this Post

Login to comment
No Comments