Klopp-a'n hrem a nihna a pawm

Liverpool boss Jurgen Klopp chuan Merseyside derby-a a chet dan avanga hrem a nihna chu a pawm a, "Hetiang hun atan hian dan chu siam a ni a, tlanchhiatsan ka tum lo," tiin insawifiahna hun an pekah pawh insawifiah a tum lo. 

Pathianni zan khan Liverpool hian Anfield-ah Everton chu injury time-a Divock Origi goal khung hmangin an hneh a, lawm luatah Klopp hi khelmual chhungah tlanlutin a keeper Alisson a kuah - dan phal loh a ni.

Klopp chuan, "Dan i zawm lo a nih chuan hremna chu i hmachhawn mai tur a ni," tiin a thiam loh thu a sawi a, Football Association chuan £8,000 an chawitir bakah a hma hunah thlen nawn tir tawh lo turin an hrilh tel.

FA-in Klopp an hrem hma hian Everton boss Marco Silva chuan a manager pui chet dan hi a hriatthiam thu leh a thu chu ni se a hrem loh tur thu a lo sawi tawh a, Manchester City boss Pep Guardiola chuan, "Season hmasa khan Southampton lakah kei pawh tiang hian ka lo che tawh a, Klopp hi ka hrethiam a ni," tiin Klopp a lo chhan tawh bawk.



Share this Post

Login to comment
No Comments