Zirlai zir belhin Man City an chak

Manchester City chuan Thawhlehni zan Premier League inkhelah Watford chu Vicarage Road-ah 2-1 in an hneh a, champion lai City manager Pep Guardiola chuan zir belh tur an neih thu a sawi.

City hian inkhel thununin Leroy Sane (40') leh Riyad Mahrez (51') hmangin goal an khung a, inkhel a thunun bawk. Amaherawhchu minute 85-naah Watford-in Abdoulaye Doucoure hmangin siphurh an sut ṭhen a, hun tawp lamah point thum hmu lo thei dinhmuna ding City an talbuai hle.

Squad chhah City

Man City-in an striker ṭha mi Sergio Aguero chu hliam vangin an la chhawr thei lo a, Argentine forward awm loh vang hian buai phah loin Raheem Sterling an la awltir ta deuh deuh. Mahse Pep-a'n English forward thlak nan hian Riyad Mahrez a la nei a, midfield-ah pawh Ilkay Gundogan aiah David Silva a rawn lut.

Tlarhnung lamah pawh Bournmouth an hneh ṭuma defender pali an thlak hlawk a; Danilo, Nicolas Otamendi, Aymeric Laporte leh Oleksandr Zinchenko te awl tirin Fabian Delph, Vincent Kompany, John Stones leh Kyle Walker te an lut thung. Pep Guardiola-a'n inkhelh tur an ngah laiin squad chhahna a hmang thiam a, a player-te thlak kual turin a huaisen bawk.

City an thiam zawk

Vicarage Road-ah Man City-in inkhel an thunun nghal a, mualneitu Watford an nawr bet. Germany international Sane-a'n ṭha taka a lakluh chu Ben Foster-a'n a beng thla hman. Mahrez leh Bernardo Silva te pawhin goal khungna hun ṭha a nei a, an khung thei lo.

Man City forward Gabriel Jesus pawhin Watford player te bumin lalut ṭha mah se pet tura a insiam meuh chuan hmun awl a tam tawh lo. Pep Guardiola hoten inkhel an thunun a, amaherawhchu Watford pawhin City tlarhnung tan buaina an siam pha tho.

Watford midfielder Roberto Pereyra chuan a ṭhiante pass lo a, amaha a tawp khar a tum avangin a hmawr a bawk thei lo. Chance ṭha ber erawh Troy Deeney-a'n a nei a, City keeper Ederson-a'n a dang ṭha takzet.

Goal hnih chauh

City-in minute 40-naah goal an khung ta nge nge a, Mahrez-a ball vawrh luh chu Sane chuan a awm (chest) hmangin goal-ah a khung a, Ben Foster-a kap karah tak a lut. Second half-ah pawh inkhel an thunun a, minute 51-naah Gabriel Jesus-a thawhrah chu Mahrez-a'n a seng a, 2-0 a ni.

Goal hniha hma an hruai hnuah City tlarhma an fimkhur tawk lo a, Jesus chuan Mahrez hnen aṭanga a ball hmuh chu keeper chiah a hmachhawn hnuah goal-ah a khung thei lo. Goal khung theihna tur hun ṭha dang pawh an nei a, mahse Pep-a nauten goal an khung belh lo.

City an talbuai

Minute 85-naah Watford substitute Gerard Deulofeu ball pet chu keeper Ederson-a'n dang a, a per chu Abdoulaye Doucoure zawnah tlain French midfielder ball pet hmasa zawk chu Walker-a'n dan sak mah se Doucoure vawi hnih petna erawh goal-ah a lut.

A tawp lamah City an buai tih a lang a, defender Laporte pawh rawn lutin Pep-a leh a hote awm nuamin an awm lo a, goal dang erawh chhuah belh loin point thum hlu tak an hlawh chhuak.

Zirlai zir belh

Man City manager Pep Guardiola chuan, "Premier League-ah hun tawp thleng ṭan a ṭul a ni tih kan hre nawn. Team ṭha zawk kan ni a, chak pawh kan phu mah se inkhel kha kan tihtawp vat a ṭul. 2-0 ah hian inkhel hi a la tawp lo a, chvuangin goal thumna kha kan mamawh a ni," tiin inzir belh tur an neih thu a sawi.

Spanish manager chuan sawi chhunzawmin, "Hun tawp dawn hnaiah goal an khung a, a tawp lamah phei kha chuan keini aiin an ṭha tawk zawk. Hei hi Premier League danglamna bik a ni," tiin a sawi.

Man City hian Inrinni zanah Stamford Bridge an tlawh dawn a, tun season league-a hneh loh la tawng lo City tan Chelsea nena an inkhel tur hi pawimawh ang.



Share this Post

Login to comment
No Comments