India tan chona thar

India cricket team hian Australia ramah test series an la la ngai lo. Virat Kohli hote hian vawiin aṭanga khelh ṭan tur Border-Gavaskar Trophy ah an record duhawm loh tak hi nuai bo an tum ang.

India leh Australia hian test match vawi li an khel dawn a, a hmasa ber chu vawiin tlai dar 5:30 hian Adelaide Oval-ah khelh ṭan tur a ni. Nimin khan team pahnihin an squad an puang a, India-in player 11 turah 12 hming an tar chhuak a, Hanuma Vihari emaw Rohit Sharma te chu an awl a ṭul dawn.

Kum 25 mi Hanuma Vihari hian test match vawi khat chiah la khelin England an hmachhawn ṭumin first innings-ah run 56 a siam a, all rounder a nih angin bowling-ah pawh wicket thum lain run 37 a pe. Hetih lai hian Rohit erawhin test match vawi 25 a khel tawh a, a khelh hnuhnun ber chu January thlaa South Africa nen an inhmachhawn ṭum kha a ni. Amaherawhchu Australia ramah innings vawi rukah chawhrualin run 28.83 chiah a vaw chhuak a, a awl ta zawk a nih pawhin a mak lo ang.

Australia lamin player 11 hming an tichiang nghal a, all rounder Mitch Marsh-a koh a ni lo chuan mak tih a hlawh hle. Captain Tim Payne chuan, "Mitch hian theihna sang tak a nei a, amaherawhchu khelh ṭhat ṭum leh khelh chhiat ṭum a inchhawk ve reng vangin kan awltir rih a ṭul. Series hnuhnung lamah chuan mamawh hun a awm ang," tiin a insawifiah.

India squad: Murali Vijay, KL Rahul, Cheteshwar Pujara, Virat Kohli (capt), Rohit Sharma, Ajinkya Rahane, Hanuma Vihari, Rishabh Pant, Ravi Ashwin, Mohammed Shami, Ishant Sharma, Jasprit Bumrah.

Australia playing XI: Marcus Harris, Aaron Finch, Usman Khawaja, Shaun Marsh, Travis Head, Peter Handscomb, Tim Paine (capt), Josh Hazlewood, Pat Cummins, Nathan Lyon, Mitchell Starc.



Share this Post

Login to comment
No Comments