Chawnpui nge Ramhlun North?

Mizoram Premier League Season 7-a point la hmu lo pahnih Chawnpui FC leh Ramhlun North FC te zanin dar 7:00 hian Lammualah an inkhel dawn.

MFA Super Cup leh I Day Football thlirin MPL club thar Chawnpui FC-in nasa takin hma an sawn tih a lang a, amaherawhchu an match hmasa bera point an hlawhchhuah zawh loh avangin inrintawkna nei turin Ramhlun North lakah result ṭha an mamawh hle.

Chawnpui coach Laldinthara chuan, "Ramhlun North an ṭha tih kan hria a, an player ṭha te ven dan tur kan zir a. Chutihrualin attacking game kan ṭhulh phah dawn lo. Chhinga Veng kan hneh loh khan midfield kha kan rem fuh chiah lo a, training-naah helai hmun pawimawh tak siam ṭha turin hma kan la a. Player pawh kan siksawi hret ang," tiin Vanglaini a hrilh.

Chawnpui hian an match hmasa berah Chhinga Veng FC chu 1-0 in an hneh lo nachungin Hualngohmun tlangval Vanlalthanga chu tlarhma lamah a hmuhnawm a, captain Lalthlamuana hoa ding tlarhnung pawh a phui ṭha thawhkhat hle. 

Ramhlun North coach F. Lalrozara chuan, "Chawnpui inkhel kha ka en a, team ṭha tak an ni. Kan fimkhur a ngaiin ka hria, Thanga leh Avida te ven dan kan ngaihtuah a ngai ang," tiin vanduai theihna an nih thu a sawi. 

Rozara hote hian match hmasa berah Mizoram Police an hneh lo a, tun dinhmunah point la hmu lo mah se an squad aṭanga thlir chuan semifinal lut tura beiseiawm zinga mi an ni. Ramhlun North hian tualchhung player ṭha bakah Nigerian forward Waheed Adekunle an kawl.

Ramhlun North coach Rozara chuan, "Tlarhnungah Felpuia a dam tawh a, Valtea a dam ṭha tawh bawk. Champion kan tum a nih chuan Chawnpui lakah point hloh a thiang lo a, point thum hmu turin kan khel ang," tiin Vanglaini a hrilh.



Share this Post

Login to comment
No Comments