Benítez & Pellegrini An club an chhanhim thei dawn em?

Rafael Benitez sulhnu thlir chuan a ropui hle. Valencia a enkawl laiin La Liga-ah nomawi vawi hnih a chawi a, UEFA Cup-ah an champion bawk. Liverpool tan ropui takin Champions League nomawi a chawi a, Chelsea chu Europa League-ah a champion pui a, khawvela coach ṭha zingah chhiar tel a ni ṭhin.

Mahse, Real Madrid boss hlui hi tunah chuan Newcastle United coach a ni a, Magpies hi Premier League-ah relegation zone-ah an awm mek. Zawhna awm chu Benitez hian Magpies hi a talchhuah pui thei ang em, tih hi a ni. 

Premier League ngainatu zingah chuan Manuel Pellegrini hre lo an tam lo ang. Kum 64 mi coach hian Argentine club lian River Plate, Real Madrid leh Manchester City a lo enkawl tawh a, club lianah a mikhual lo. 

Kuminah indinthar tum West Ham-in an club chanchina coach hlawh hnem ber ni turin Chinese Super League lam aṭangin an thlem chhuak a, mahse Chilean coach hian league match li khelh tawhah a team a la tlawmpui vek a, Premier League-a point la nei miah lo awmchhun an ni.

Engvang nge?

Zawhna tam tak zinga zawhna langsar tak chu manager langsar pahnih hi engvangin nge season ṭantir aṭangin an talbuai nghal, tih hi a ni. Newcastle an vanduai a, league match li an khelh tawhah Tottenham Hotspur leh Chelsea an mikhual a, Manchester City an lenchilh bawk.

Magpies fixture hmasa lamah club lian an tam a, point thum an hlawhchhuah theihna chhun nia ngaih Cardiff City lakah lah point khat chiah an hlawh chhuak a, hun pek belha Kenedy khan penalty chhuih lut se chu point thum hmu tawh an ni mai tur!

Benitez-a buaina chu striker thar Salomon Rondon an nei chunga goal khung an harsat hi a ni - match li-ah goal thum chiah an la khung! Benitez-a'n a team theihna hrechiangin counter attacking game a khel ṭhin a, a buaithlak lai chu a hmawr bawk tur a nei ṭha tawk lo ṭhin lai hi a ni. 

Hammers ve thung

West Ham-in season duhawm tak hman an tum tih chianna chu sum tamna Chinese Super League aṭanga Pellegrini an thlem chhuak thei hi a ni a, nipui transfer bazar-ah pound maktaduai 100 dawn an seng bawk.

Mahse, Chilean manager hian attacking football a khel ṭhin a, a duh ang taka khel chhuak turin City-ah chuan player a nei a, Hammers player ten he attacking game hi an la thiam ve lo niin a lang a, midfield-a Jack Wilshere leh Mark Noble hi attacking game thlawp turin an rang tawk lo tih a chiang bawk.

West Ham player-ten match li an khelh tawhah kilometre 422.47 chiah an la tlan a, anni aia tlan tlem awmchhun hu Manchester United leh Cardiff City chiah an ni - attacking football khel chunga tlan tlem chu thil inrem lo tak a ni!

Tho thei tak maw?

Match li chiah a la ni a, thutlukna siam nan chuan a la hma mai thei. Benitez leh Pellegrini te hian an team hi an thawhpui leh thei ang em? tih zawhna lian tak a awm a, manager pahnih history keu let chuan fan-te tan lawmna tur lam a ni.

Benitez hian Magpies-a a season hmasa berah Premier League inhamtanpui lo mah se a season lehpekah an invawrhkai lehnghal a, season hmasa khan tla mai tura ngaih ni mah se budget tlem tak nei chungin Premier League a inhamtanpui.

Spanish second division club pahnih Extremadura leh Tenerife te chu La Liga a invawrhkai pui ve ve a, Italian club 'vantlang' ni hman Napoli chu Serie A team hlauhawm zingah a chher 'leh' a, Europa League-a Chelsea a champion pui pawh kha Blues tlakchhiat lai a ni.

Pellegrini leh club tenau

Kum 64 mi manager hian club satliaha ngaih Malaga a enkawl laiin La Liga-ah palina a nihpui a, Champions League quarterfinal hial a hruai thleng thei!

Malaga hma hian team vantlanga ngaih Villarreal enkawlin a season hmasa berah La Liga-ah pathumna a nihpui a, a season hnihnaah Champions League semifinal hial a hruai thleng - a hnathawhte avang hian fak a hlawh hle.

Benitez leh Pellegrini-in in an lohna erawh an nei - Magpies-ah Benitez a tlatlum a, eng result pawh nei se fan-ten an thlawp tlat ang. Chilean manager Pellegrini erawh fans aṭangin sawiselna a ri leh ṭan der tawh a, Hammers siam ṭhatna hun a nei ang em, tih pawh hi ngaihtuah tham tak a ni.



Share this Post

Login to comment
No Comments