Kluivert-a'n Rome a pan

Ajax winger Justin Kluivert chuan AS Roma tana khel turin Thawhṭanni zan khan Roma a pan a, nimin khan medical test nei zuiin he thu i chhiar chuan inremna an ziak fel hman tawh ang.

Kum 19 mi Kluivert hi Netherlands international striker hlui Patrick Kluivert fapa a ni a, season hmasa khan Dutch club tan match 30 a khelh aṭangin goal 10 a khung. Kumin March thla khan an ram senior team tan a vawi khat nan a inlan bawk.

Ajax chhul chhuak Kluivert hian 2017 khan senior team a zawm ve chiah a, thla hnih hnu lekah goal khung ṭan nghalin; a theihna leh thiamna hmu fuhtu Manchester United nen pawh sawi zawm a lo ni tawh. Premier League pahnihna hian pound maktaduai 17.6 velin an lalut dawn niin an sawi hman.

Mahse, Ajax academy aṭanga inzir chhuak Kluivert-a'n tharum man hnemna England ai chuan a pa hnungzuiin Italy lam pan a thlang ta zawk. Patrick Kluivert khan Ajax chu 1994 - 1997 chhung khan Eredivisie title pahnih leh Champions League nomawi a chawi pui a, chumi hnuah AC Milan leh Barcelona tan a khel zui leh a ni.



Share this Post

Login to comment
No Comments