King of Clay tia Rafael Nadal an sawi chhan chu...

Infiamna khawvela mi hmingṭha leh langsar te hian engtianga hun harsa leh hautak nge an patlang tih chu hriat vek sen a ni lo a, a bik takin stadium chhunga an inkhel entu bakah chanchinbu leh TV aṭanga an chanchin thar hre ṭhintute chuan a phena thil inphum hi an hre lo fo.

Rafael Nadal-a'n tun hnai kum 13 chhung chu French Open a thunun hneh hle a, June 10 zan khan Dominic Thiem hnehin a vawi 11 nan a champion leh tawh. 'King of Clay' tia hming lem an pek hial Nadal hi eng vang takin nge clay court-ah hian a thiam fal bik em em tih chu tennis ngainatute hriat chak a ni.

'Infiamna huang chhungah hian clay court-ah bik set nga khelh hnuah Rafa hneh chu thil harsa ber a ni' tiin an sawi ṭhin. Grand Slam vawi sarih champion tawh John McEnroe chuan, "An thu sawi hi a dik, ka pawm thlap," tiin a sawi.

King of Clay

World number 1 Nadal hi mipa player dangte aia a danglamna chu forehand na tak a nei leh, a khingpuite ball vuak dawngsawng tura a insiamrem rang em em hi a ni. Nadal ball vuak hi kang sang deuh luahin a lang ṭhin, kawh taka kal lo angin lang mah se ball a vaw vir a, duh ang taka vuak let a harsa bik hle.

Hmun chep leh kil tak aṭangin forehand ropui tak tak a nei fo a, miten an hmuh chak leh dahsan ber pawh a ni. Tharum a ngah avangin a insiam rem hman zel, a bik takin clay-ah chuan ball a kal na lo a, a sawt sang lo bawk. Player dangin harsa tak tura an ngaihin vaw phei ṭhin mah se Nadal hian a vuak let theih zel avangin a tawpah point hmutu zawkah a ṭang zel.

French Open vawi ruk champion tawh Bjorn Borg chuan, "Ka ngaihdan chuan Nadal inkhel kan en a nih chuan khawvela player ropui ber chevel kan hmu tihna a ni. Hmun chep tak aṭanga thawhchhuah dan a thiam a, a khingpuite a nawr nain a ball vuak apiang mai hi a hlauhawm vek," tiin Nadal chungchang a sawi.

Tun hmain Nadal-a'n Roland Garros-ah a zawna set 32 lain record thar a lo siam tawh a, ama record siamsa hi tun hnaiah khumin set 37 ngawt a la zawn. Argentine tlangval Diego Schwartzman lakah set khat a hloh zeuh tih mai loh kha chu kuminah pawh a chesual eih lo. Tennis a khelh chhunga nomawi 79 a chawi tawh zinga 57 zet chu clay cout aṭanga a vuak chhuah a ni.

Football aiah Tennis

Rafel Nadal hi sumdawng hausa tak chhungkua aṭanga seilian a ni a, apa hi sumdawng hausa niin glass leh window company an nei. A naupan lai chuan tennis leh football a khel ṭhin a, amah hringtu Sebastian Nadal chuan a zirlai a buai lutuk loh nan pakhat zawk thlang fel turin a duh.

A patea (uncle) Toni Nadal chuan a fapa chu tennis khel tur zawk niin a ngai. Toni hian hmathlir thui tak a nei a, kum riat mi lek a nih lai aṭanga tennis kheltu Nadal hi a ban vei lam a hmantir daih - a khingpuite tana hmachhawn a harsat zawkna tura a ngaih a ni.

Kum 12 mi a nihin Real Madrid ṭantu Nadal chuan, "Tennis ka thlang e, football chu ka khel zui lo ang," tiin thutlukna a siam. Spanish tennis federation chuan theihna a neih zia hriain Mallorca aṭangin Barcelona-ah insawn turin thurawn an pe. Tennis khel zel tura zirtirna a dawn ṭhat theih zawk an beisei vang a ni.

Mahse, Toni ngaihdan nen a inang lo, a zirna a tihbuai an hlauh bakah insawn an tum lo. Toni chuan, "Infiammi ṭha tak ni tuin America-ah emaw hmun dangah kal kher a ngai lo, mahni in aṭangin a tih theih," tih chu a ngaihdan a ni. Hei vang hian Sebastian Nadal chuan a fapa zirna tur sum a tum sak vek a ngaih phah ta a ni.

A tawi zanga sawi chuan, Nadal chhungkua hian thutlukna a siam sual lo. A khelh duh ber tennis thlangtu Nadal pawhin a theihna a ti pung a, ban vei lam hman tir tlattu Toni chu a hlawhtlin theih nana sulsutu lian leh pawimawh a ni chho bawk.

World number 2 hlui Michael Chang chuan, "Ka hmuh dan chuan Rafa hian a ban ding lamin vua se tun hi a phak lo ang. Vei lam a hman avangin a forehand na tak chu a khingpui ten a tam zawk chu backhand-a an lak a ngaih phah a, ball rawn let kha a nat lutuk loh avangin atan kawng a awlsam phah a ni," tiin a sawi.

Hmabak

Nadal hi June 3 khan kum 31 a tling chiah a, atan inelna zawng zawnga inlan vek chu a awlsam tawh lo mai thei. French Open nomawi a chawi hnuah July thlaa khelh tur Wimbledon-ah a inlan ngei dawn em tih a chian loh thu a sawi.

Grand Slam vawi 17 champion tawh Nadal chuan, "Ka hliam a dam hnuah clay-ah thla hnih chhung vel ka inkhel zui char char a ni a, tunah chuan Wimbledon sawi nghal a harsa. Ka team-te nen kawn sawi khawm ang a, hun rei lote hnuah kan puang ang," a ti. Nadal hian tun season chhungin Monte Carlo, Barcelona leh Rome Open-ah te nomawi a chawi bawk a ni.

Nadal hi clay ni lo court dangah a ṭha tawk lo tia sawiselna a awm ṭhin. Mahse, grass court inelna lian ber Wimbledon title pawh vawi hnih a la tawh. British hoin 'Sir' nihna an pek Andy Murray nen an champion zat a inang! Hard court-ah pawh nomawi lian pali a chawi tawh bawk.



Share this Post

Login to comment
No Comments