Player upa ber El-Hadary

Egypt captain Essam El-Hadary chu World Cup khel tur zinga upa ber a ni. Kum 45 mi El-Hadary hi football khawmpui lian ber an hman tawh zawng zawng zinga upa ber a ni nghal bawk ang. 

World Cup hnuhnung berah khan Colombia goalkeeper Faryd Mondragon chu kum 43 mi ni chungin a inlan a, inlan thei upa ber a ni. Tunah chuan El-Hadary-a'n a rawn khum dawn. Goalkeeper El-Hadary hian 1996 aṭang khan an ram tan goal a veng ṭan tawh a, ram tan hian match 158 zet a khel tawh. 

Kum 39 mi Rafael Marquez chu player zinga Russia pan tur upa pahnihna a ni. Mexico international hian season hmasa rual khan football chawlhsan a tum tawh a, mahse 2002, 2006, 2010 leh 2014 World Cup-a an ram aiawh tawhtu hi ramin a mamawh vangin koh a ni.

Kumin World Cup-ah hian rawlthar an inlan tam dawn lo, kum 20 tling lo pasarih chiah an awm ang. Player 736 kum chawhrual chu kum 28 bawr vel a ni dawn a, player an inlan upat ber ṭum a ni ang.



Share this Post

Login to comment
No Comments