Tute nge UCL khel dawn?

Premier League-a pangana dinhmun hauh mektu Chelsea-in Southampton laka goal hniha an hnufual hnuah an lehthal a, 3-2 in an chak. Inrinni zanah palina dinhmun hauhtu Tottenham Hotspur-in champion mai tur Manchester City an hneh loh zui avangin Blues tan Champions League khelh a la beisei theih ang.

St Mary's Stadium-ah Saints-in Dusan Tadic (21') leh Jan Bednarek (60') hmangin hma an hruai a, Chelsea an talbuai hle. Amaherawhchu Antonio Conte-a'n substitution awmze nei a siam a, bench aṭanga lut Olivier Giroud chuan minute 70-naah goal a khung a, Chelsea-in nawr na chhunzawmin Eden Hazard chuan minute nga hnuah an siphurh a sut a, minute 78-naah French striker-in chakna goal a khung.

Blues manager Antonio Conte chuan, "First half-a kan khelh danah ka thinur a, second half-ah kan thlak danglam a, a tawp thlengin chak duhna neiin kan khel thung. Kan result chu eng pawh ni se player-te rilru put hmang dik khan minti lawm," tiin a sawi.

Hetihlai hian Champions League semifinal thleng thei Liverpool-in Bournemouth 3-0 in an hneh a, Mohamed Salah-a'n a goal hnihna khungin league-ah goal 30-a khung tling tawh a, Harry Kane aiin goal ngain a khung tam tawh zawk. Pathumnaa awm Reds tan hian Sadio Mane leh Robert Firmino ten an khung bawk a, match khat a khel tamin Blues aiin point 10-in an hmu tam tawh zawk.

UCL khel turin Manchester khaw club pahnih chu hmun himah an awm tawhah a ngaih theih a, Liverpool tan palina china awm a harsat tawh hmel loh a, Tottenham leh Chelsea ten hmunruak pakhat an inchuh dawn niin a lang. Paruknaa awm Arsenal erawh league-a an dinhmun ni loin Europa League champion ni chungin UCL khelh an tum ang.



Share this Post

Login to comment
No Comments