Jupp Heynckes thlaktu tur Niko Kovac

Bayern Munich manager Jupp Heynckes-a'n tun season tawp thleng bak a hna a thawk zui dawn lo a, season thar aṭangin Eintracht Frankfurt manager nilai Niko Kovac chuan German champion hi a enkawl chhunzawm tawh ang.

Bayern sporting director Hasan Salihamidzic chuan kum thum chhung atan Kovac hi inremna an siampui thu a sawi chiang a, kum 46 mi Kovac-a contract hi July 1 aṭanga chhiar ṭan tur niin, pre season tour aṭangin a kaihruai dawn tihna a ni.

Kum 72 mi Heynckes chuan, "Kovac hi a thawkrim a, thil thar ching chhuak thei leh thusawi thiam tak a ni bawk. A nun pum hi football tan a hlan a, manager ṭha tak a nih bawk avangin Bayern hian thutlukna dik an siam niah ka ngai," tiin amah thlaktu tur Kovac chungchang a sawi.

Tu nge Kovac?

Croatia captain hlui leh an ram team pawh enkawl tawhtu Kovac hian player a nih laiin Bayern Munich tan 2001-2003 season chhung khan a khel tawh a, a unaupa Robert Kovac pawh Bayern player hlui tho niin, Allianz Arena-ah hian assistant coach a ni ve nghal ang.

Kovac hi a nu leh pa te chu Croa­tian ni mah se Germany khawpui Berlin-a piang a ni a, 2016 aṭang khan Eintracht Frankfurt enkawl ṭanin, tunah hian 2019 thleng daih contract a nei mek. A season hmasa berah thla thei dinhmuna ding chu chhanhimin, DFB Cup final a hruai thleng a, tun season Bundesliga khelh laiah pangana an ni mek bawk.

Bayern Munich sporting direc­tor Hasan Salihamidzic chuan, "Niko hian hna ropui tak a thawk, dinhmun harsa taka awm Frankfurt a hruai chhuak a, tun dinhmunah chuan Europe-a inlan an tum der tawh a ni. An ram team chu World Cup-ah a kaihruai tawh bawk. Bayern tana khel tawh niin, he club kal­phung hi a hre bel sa a ni," tiin a sawi.

Kovac kher

German manager Heynckes-a'n tun season tawp thleng bak Bayern a enkawl loh tur thu a sawi chianna a rei tawh a, amah thlak tur hian khawvel huap manager hming langsar tak tak lamrik an ni.

World Cup-a Germany cham­pion puitu Joachim Low chu hming langsar ni mah se, Low hian 2020 thleng a contract neih lai hman zawh a tum thu a sawi chiang tawh. 

Tottenham manager Mauricio Pochettino hming lamrik a ni bawk a, Argentine manager hian London-ah a hna ngai thawh chhunzawm a duh. Borussia Dort­mund coach hlui Thomas Tuchel pawhin Bayern enkawl theihna hun ṭha nei mah se German champion hi a hnar nia sawi a ni.

Bayern Munich hian an team enkawl tur hian an duhthusam tak an la em? tih chu zawhna awm thei a ni. Chutih rualin tun hnaia a sulhnu aṭanga teh chuan Kovac hi manager rintlak tak tur chu a ni. Amaherawhchu, Pep Guardiola leh Carlo Ancelotti te enkawl tawh hnu enkawl hi hna awlsam a ni lo ang.

A la tawp lo

Bayern Munich hian a zawna a vawi ruk nan Bundesliga nomawi an chawi dawn tih a chiang tawh. Inrinni zan khan league match khel zui lehin, an mikhual Borussia Monchengladbach lakah goal khat phur hmasa mah se 5-1 ngawtin an lehthal thei a ni.

German champion tan hian Sandro Wagner-a'n goal hnih a khung bakah Thiago Alcan­tara, David Alaba leh Robert Lewandowski te chuan goal khat ṭheuh an khung bawk.

Bayern hian Bundesliga nomawi bakah nomawi lian dang pahnih an la beisei mek. German Cup semifinal-ah Bayer Leverkusen nen an inkhel dawn a, Champions League semifinal-ah pawh season hmasa lama an hneh loh Real Madrid an hmachhawn dawn bawk.

Treble champion nihpui chunga Bayern enkawl hna chawlh santu Heynckes hian, mamawhna vanga Bayern a enkawl lehnaah hian nomawi lian pathum chawi chunga chawlh leh theihna hun a nei mek.



Share this Post

Login to comment
No Comments