Record thar siamtu Barca an kal zel

Barcelona chuan an mikhual Valencia 2-1 in an hneh a, La Liga match 39 chhung chak loh an nei tawh lo a, record thar siamin league-ah hmahruaitu an nih chhunzawm zel.

Catalan club tan Luis Sua­rez leh Samuel Umtiti te chuan goal khat ve ve an khung a, Champions League beiseitu Valencia tan Dani Parejo chuan an si phurh sut ṭhen mah se goal an khung hian hun tawp nan minute hnih chiah a awm tawh a, harhtharna an chan phah lo.

Nizan lamah Atletico Ma­drid leh Real Madrid an inlan a, an result kan hre hman lo. Real hian hnehna an chang a nih chuan an chung chiaha awm pathumna Valencia hi an lehthal leh thei dawn a ni.

Suarez & goal

Barcelona-in goal khung turin hun an mamawh rei lo. Minute 15-na lekah Luis Suarez a inlar a, Liverpool tana a lo khelhpui tawh ṭhin Philippe Coutinho ke aṭanga chhuak ball chu Valencia keeper Neto dan hman lohin a khung - Suarez tan league-a a goal 23-na a ni.

Minute 51-naah Barcelona-in an goal hnihna an khung leh chauh a, hei pawh Coutinho ke aṭanga chhuak bawk a ni. Pound maktaduai 142 man midfielder hian corner a pet a, Samuel Umtiti chuan an goal hnihna ni turin a tauh lut.

Barcelona-in hahdam takin hnehna an chang mai dawn emaw tih hnuah Ousmane Dembele chu Andreas Pereira lakah a foul a, penalty a chawi. Hun tawp nan minute hnih chauh a awm tawh tihah Parejo chuan goal-ah a chantir a, goal dang khung tur erawhin hunin a daih tawh lo.

Barcelona record

May 1980 khan Real Socie­dad chuan league-a match 38 chhung tlawm hmel hmu lo record an lo siam tawh a, he record hi kum engemaw zat khum loh a nih hnuah Bar­celona chuan an rawn khum ta. 

Catalan club hian tun season-ah league match 32 khel tawhin an la tlawm miah lo a, season hmasa league match hnuhnung pasarih nena belhkhawmin match 39 ngam loh an tawng ta lo a ni. Barca hian match ruk chiah khelh an hmabak tawh a, tlawm miah loa league nomawi chawi turin an dinhmun a ṭha hle.

Barcelona-in treble cham­pion nih an beiseina erawh kar hmasa khan tihtawpin a lo awm tawh a, AS Roma chuan Champions League quarterfinal aṭangin an pet chhuak. Mahse, league-a an dinhmun a ṭhat bakah Copa del Rey-ah final an luh tawh avangin kut ruak chuan season an mangṭha dawn lo tih a chiang. 

Valverde thukhawchang

Champions League aṭangin Barcelona petchhuah an ni miau a, record an siam zanah meuh pawh Barca boss Ernesto Valverde lawm a kim lo. Spanish manager chuan, "Record sawi hun a ni lo a, chuti teh ualin kan ngai pawimawh lo. Result duhawm lo tak hlawhchhuah hnua result ṭha neih zawk hi thil lawmawm chu a ni," a ti.

Barcelona hian league match ruk aṭangin point 18 hlawh­chhuah tur an la nei a, heta ṭang hian point sarih lek an hlawhchhuah belh a nih pawhin an champion tawh ang. 

Hetihlai hian Valverde chuan Roma vanga hrehawm an tih thu pha loin, "Zep lohah chuan club boruak a hrehawm em em a, player-te pawh an nguai a ni. Min ṭantute beiseina kan tih thlawn sak a, kan thil tumah kan hlawhtling lo. Mahse, hun kal tawh chu a liam tawh a, tun season-ah eng nge kan la tih theih tih zawk hi kan thlir tur a ni," tiin a sawi.



Share this Post

Login to comment
No Comments